Вандалы пакінулі на будынку ЕГУ патрабаванне да Ціханоўскай “прыбірацца з Вільнюса”

1 жніўня, Позірк. На будынку Еўрапейскага гуманітарнага ўніверсітэта ў Вільнюсе невядомыя пакінулі надпіс “Ціханоўская, прэч з нашага горада”. Пра гэта паведамляе тэлеграм-канал “МотолькоПомоги”.

Надпіс быў зроблены на літоўскай мове з памылкамі. Гэта ўжо другі выпадак вандалізму, накіраваны супраць прысутнасці беларусаў у літоўскай сталіцы.

У ноч на 28 ліпеня ў Вільнюсе было атакавана памяшканне беларускай творчай прасторы і крамы “Кропка”. На будынку невядомыя пакінулі надпіс на літоўскай мове “Вяртайцеся дадому, беларускія свінні” з трыма арфаграфічнымі памылкамі. Таксама было разбіта акно. Уладальнік арганізацыі, былы палітвязень Дзмітрый Фурманаў заявіў “Позірку”, што лічыць гэтае здарэнне “правакацыяй лукашыстаў”.

Творчую прастору і краму “Кропка” ў літоўскай сталіцы Фурманаў адчыніў разам з жонкай Вольгай у траўні 2024 года. Там прадаюцца сувеніры, вырабленыя ў тым ліку майстрамі, якія пакінулі Беларусь праз пагрозу палітычнага пераследу.

Напад на “Кропку” — “чарговая правакацыя рэжыму” Лукашэнкі, каб “пасварыць беларусаў і літоўцаў, сфармаваць варожае стаўленне да беларусаў у Літве і пасеяць пачуццё страху сярод беларускай супольнасці”, заявіла дэмакратычны лідар Святлана Ціханоўская.

30 ліпеня каманда “Кропкі” абвясціла збор грошай на рамонт.

31 ліпеня паліцыя Вільнюса апублікавала здымак падазраванага ў вандалізме.

Варта адзначыць, што напісанне некаторых літар у абедзвюх абразлівых надпісах практычна супадае.