Працадаўцы ў Літве з 1 жніўня будуць плаціць дзяржпошліну пры найманні замежнікаў
28 ліпеня, Позірк. Працадаўцы ў Літве, якія жадаюць працаўладкаваць замежнікаў, будуць абавязаныя заплаціць дзяржаўную пошліну за хадайніцтвы аб выдачы або абмене часовага віду на жыхарства такіх супрацоўнікаў, а таксама выдачы ім нацыянальнай візы, паведамляе Дэпартамент міграцыі пры Міністэрстве ўнутраных спраў гэтай балтыйскай краіны.
Акрамя гэтага, як заяўляецца, пошліна будзе збірацца пры змене замежнікам працадаўцы.
“З 1 жніўня памер такога збору складзе 50 еўра за кожную запоўненую электронную пісьмовую форму”, — удакладняе міграцыйная служба.
Падкрэсліваецца, што згаданая плата прадугледжаная прынятымі ўрадам папраўкамі ў пастанову “Аб зацвярджэнні пераліку канкрэтных сум дзяржаўнай пошліны і правілаў выплаты і вяртання дзяржаўнай пошліны”.
Гэтая норма распаўсюджваецца на “ўсе выпадкі запрашэння замежніка. у Літву на працу”, гаворыцца ў паведамленні ведамства.
Пры гэтым дзяржпошліна не будзе спаганяцца пры працаўладкаванні замежнікаў выкладчыкамі, навуковымі работнікамі, прафесійнымі спартсменамі, артыстамі, журналістамі, кіраўнікамі дзяржустаноў, рэлігійнымі служыцелямі.
Вызваляюцца ад выплаты збораў таксама ВНУ пры прыёме на вучобу замежных студэнтаў і праграмы валанцёрскай дзейнасці.
Паводле звестак Дэпартамента міграцыі пры МУС Літвы, на 1 ліпеня ў гэтай краіне пражывала 62.535 грамадзян Беларусі.
На 1 студзеня іх было 62.167. Такім чынам, за паўгода беларуская дыяспара — другая ў краіне па колькасці — вырасла на 0,6%.
Самая шматлікая нацыянальная група замежнікаў у Літве — украінцы, іх налічвалаася 76.145. Міграцыйная служба адзначала, што з іх амаль 44.000 — “уцекачы, якія ратуюцца ад расійскай агрэсіі і на якіх распаўсюджваецца дзеянне ўведзенага ЕС механізму часовай абароны”.
Трэцяя па велічыні дыяспара ў Літве — расіяне (на 1 ліпеня — 15.536; -2,2% у параўнанні з 1 студзеня), чацвёртая — узбекі (10.200; +24,4%), пятая — таджыкі (каля 7.000; +22,8%).
На пачатак другога паўгоддзя ў літоўскай дзяржаве пражывала 221.285 замежнікаў, за паўгода іх колькасць зменшылася на 0,3%.
