3 ліпеня на волю выйшлі Дар’я Лосік і яшчэ чатыры жанчыны-палітзняволеныя (дапоўнена)

24 ліпеня, Позірк. На волю 3 ліпеня выйшлі палітзняволеныя Дар’я Лосік, Тамара Астрэйка, Святлана Лупач, Кацярына Мадзянкова і Паліна Палавінка, паведамляе “Гомельская Вясна”.

Усе яны ўтрымліваліся ў папраўчай калоніі № 4 у Гомелі.

У персанальных картах на сайце праваабарончага цэнтра “Вясна” адзначана, што яны вызваленыя па амністыі ці памілаванні.

Раней пра выхад жанчын на свабоду не паведамлялася.

Лосік была затрымана 18 кастрычніка 2022 года пасля ператрусу ў кватэры. Супраць яе распачалі крымінальную справу за “садзейнічанне экстрэмісцкай дзейнасці” (ч. 1 арт. 361⁴ КК) — інтэрв’ю ў красавіку 2022 года тэлеканалу “Белсат”, прызнанаму “экстрэмісцкім фарміраваннем”. 19 студзеня 2023 года Лосік была прыгаворана Брэсцкім абласным судом да двух гадоў пазбаўлення волі ў калоніі агульнага рэжыму. Апеляцыйную скаргу 21 сакавіка таго ж года Вярхоўны суд не задаволіў.

Астрэйка была затрымана 15 лістапада 2023 года. Суд Ленінскага раёна Мінска 16 лютага 2024 года пазбавіў яе волі па арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Праваабаронцы не змаглі высветліць, на які тэрмін.

Святлану Лупач — дачку пераследуемага ў крымінальным парадку і журналіста Дзмітрыя Лупача, які знаходзіцца за мяжой, — затрымалі 7 траўня 2023 года. Працэс над ёй пачаўся 16 кастрычніка 2023 года ў судзе Першамайскага раёна Віцебска па арт. 342 КК. Прысуд — 1,5 года пазбаўлення волі. 19 студзеня 2024 года МУС унёс яе ў “спіс экстрэмістаў”.

Мадзянкова была затрымана 9 кастрычніка 2023 года. Суд Добрушскага раёна (Гомельская вобласць) 22 снежня 2023 года прыгаварыў яе па ч. 1 арт. 342 КК да пазбаўлення волі (тэрмін невядомы).

Палавінку затрымалі 2 чэрвеня 2022 года. Мінскі гарсуд 2 снежня прыгаварыў яе да 2,5 года пазбаўлення волі і наклаў на яе штраф у памеры 100 базавых велічынь (на той момант 3.200 рублёў).

Раней праваабаронцы заяўлялі пра 18 палітвязняў, якія 3 ліпеня выйшлі на волю. Сярод іх 4 жанчыны і 14 мужчын, у тым ліку прыгавораны да 10 гадоў калоніі старшыня Партыі БНФ Рыгор Кастусёў, які пакутуе на анкалагічнае захворванне. Прозвішчы іншых вызваленых не абнародаваліся з меркаванняў бяспекі.

Старшыня Вярхоўнага суда Валянцін Сукала на тэлеканале “Беларусь 1” 21 ліпеня заявіў пра 14 вызваленых і дапусціў, што гэтая колькасць можа павялічыцца. Паводле яго слоў, у рамках амністыі, якая праходзіць у краіне, могуць быць вызваленыя асобы, якія бралі ўдзел у пратэстах 2020 года, “калі яны не здзейснілі ніякіх небяспечных дзеянняў у адносінах да правапрымяняльнікаў”.

2 ліпеня Лукашэнка анансаваў вызваленне цяжкахворых апанентаў улады. У той жа дзень ён падпісаў закон аб амністыі з нагоды 80-годдзя вызвалення Беларусі, які, аднак, па змесце не распаўсюджваецца на асобаў з “экстрэмісцкіх спісаў”.

Паводле звестак праваабаронцаў, не ўсе вызваленыя былі цяжкахворымі.