Камісія па вяртанні палітэмігрантаў разгледзела яшчэ два звароты

31 кастрычніка, Позірк. Пад старшынствам генеральнага пракурора Андрэя Шведа “камісія па разглядзе зваротаў грамадзян Беларусі, якія знаходзяцца за мяжой” разгледзела два звароты палітэмігрантаў, паведамляе Генпракуратура.

Адзначаецца, што адной заяўніцы вырашана паведаміць, што ў яе дачыненні прызнана “мэтазгоднасць замены <…> меры стрымання ў выглядзе заключэння пад варту на больш мяккую”.

Наглядны орган сцвярджае, што жанчына “чыстасардэчна раскаялася, паведаміла пра гатоўнасць прынесці публічныя прабачэнні і пакрыць нанесеную шкоду”.

“Шчыра жадае вярнуцца на Радзіму да сям’і, малалетняй дачкі і састарэлых бацькоў, якія маюць патрэбу ў яе клопаце і дапамозе”, — гаворыцца ў паведамленні Генпракуратуры.

Іншы чалавек, які звярнуўся ў камісію, паказаў, што баіцца вяртацца на радзіму, бо “ў 2020 годзе ўдзельнічаў у несанкцыянаваных мітынгах, дваровых сходах, вывешваў бел-чырвона-белыя палотны, выказваў недавер да вынікаў выбараў”.

Камісія падрыхтавала адказ аб “адсутнасці ў дачыненні да яго распачатага адміністрацыйнага працэсу аб правапарушэннях, узбуджанай крымінальнай справы і іншых адпаведных неспрыяльных наступствах”.

Камісія прымае заявы да 31 снежня 2023 года.

Рашэнне стварыць камісію было прынята 24 студзеня па выніках нарады ў Аляксандра Лукашэнкі. Адпаведны ўказ ён падпісаў 6 лютага.

Па стане на ліпень у камісію звярнулася ўсяго 16 чалавек, сцвярджала ініцыятыва “Кіберпартызаны” са спасылкай на атрыманыя дакументы.

У пачатку траўня Швед паведаміў у эфіры Беларускага тэлебачання пра паступленне больш за 70 заяў, але не стаў называць прозвішчы тых, хто звярнуўся. У канцы таго ж месяца наглядны орган адрапартаваў аб чарговым пасяджэнні камісіі, на разгляд якой, як сцвярджалася, былі вынесеныя звароты больш за 20 асоб. Прадстаўнікі дэмакратычных сіл неаднаразова папярэджвалі суайчыннікаў, якія эмігравалі, аб небяспецы вяртання праз пагрозу арышту.