На сумеснай трэніроўцы беларускія і кітайскія вайскоўцы займаюцца паветрана-дэсантнай падрыхтоўкай

9 ліпеня, Позірк. Заняткі па паветрана-дэсантнай падрыхтоўцы праходзяць у рамках сумеснай трэніроўкі вайскоўцы Беларусі і Кітая, паведамляе прэс-служба Міністэрства абароны.

Трэніроўка называецца “Атакуючы сокал”, адзначаецца, што яе ўдзельнікі “адпрацоўваюць наземныя элементы скачка з парашутам”.

Заняткі праходзяць “у рамках будучага дэсантавання вайскоўцаў дзвюх краін”, удакладняе беларускае абароннае ведамства.

“Вайскоўцы выконваюць укладку парашутных сістэм, уключаючы праверку строп, налістванне і надзяванне камеры на купал асноўнага парашута”, — гаворыцца ў паведамленні.

Пры дэсантаванні “кітайскія вайскоўцы будуць выкарыстоўваць свае парашутныя сістэмы”, падкрэслівае Мінабароны.

6 ліпеня паведамлялася аб прыбыцці Беларусь кітайскіх вайскоўцаў для ўдзелу ў сумеснай трэніроўцы з падраздзяленнямі Узброеных сіл Беларусі.

Адзначалася, што манёўры пройдуць 8–19 ліпеня пад Брэстам паблізу мяжы з Польшчай у рамках “гадавога плана і кітайска-беларускіх дамоўленасцяў”.

Мінабароны Беларусі сцвярджае, што трэніроўка дазволіць бакам “абмяняцца вопытам, правесці зладжванне беларускіх і кітайскіх падраздзяленняў, стварыць падмурак для далейшага развіцця беларуска-кітайскіх адносін у сферы сумеснай падрыхтоўкі войскаў”.

Аляксандр Лукашэнка на сустрэчы з міністрам абароны КНР Лі Шанфу 17 жніўня 2023 года заявіў, што ваеннае супрацоўніцтва дзвюх краін “ні ў якім разе не будзе накіраванае супраць трэціх краін”. “Нам гэта не трэба, нам трэба засцерагчы свае дзяржавы і свае народы”, — сказаў ён.