31 траўня, Позірк. “Пытанні бяспекі і недапушчэння эскалацыі ўкраінскага канфлікту” абмеркаваў падчас тэлефоннай размовы 31 траўня з Уладзімірам Пуціным Аляксандр Лукашэнка, паведамляе прэс-служба апошняга.
Адметна, што сайт Крамля гэтую тэму ў сваім паведамленні не згадаў.
Паводле інфармацыі беларускага боку, Лукашэнка паведаміў суразмоўцу пра дэталі свайго будучага візіту ў Манголію і Іркуцкую вобласць РФ. Яны таксама абмеркавалі “будучы Форум рэгіёнаў Беларусі і Расіі і прадстаўніцтва расійскай дэлегацыі на гэтым маштабным мерапрыемстве”, “абмеркавалі пытанне прадстаўніцтва Расіі на парадзе 3 ліпеня ў Мінску”.
Прэс-службы Лукашэнкі і Пуціна адзначылі, што падчас размовы абмяркоўваліся пытанні, звязаныя з будучым самітам Шанхайскай арганізацыі супрацоўніцтва ў Астане, на якім, як чакаецца, Беларусь стане паўнапраўным членам гэтай арганізацыі.
Паводле інфармацыі беларускага боку, прэзідэнт РФ праінфармаваў суразмоўцу “пра працу ўрада Расіі па рэалізацыі дамоўленасцей, дасягнутых у Мінску”.
24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль. З беларускай тэрыторыі расійскае войска ажыццявіла прамы напад на суседнюю краіну, затым на працягу некалькіх месяцаў праводзіліся ракетныя абстрэлы ўкраінскіх гарадоў. Таксама расійскія вайскоўцы карысталіся беларускай вайсковай інфраструктурай.
