Беларусь і Алжыр абмяркоўваюць магчымасць адкрыць амбасады і ўсталяваць прамыя авіязносіны

15 красавіка, Позірк. Беларусь і Алжыр дасягнулі “шэрагу важных дамоўленасцяў”, скіраваных на “далейшае ўмацаванне двухбаковых сувязей”, заявіў міністр замежных спраў Сяргей Алейнік 14 красавіка ў сталіцы гэтай паўночнаафрыканскай дзяржавы па выніках перамоў з міністрам замежных спраў і нацыянальнай дыяспары за мяжой Ахмедам Атафам.

“Асаблівую ўвагу”, паводле інфармацыі прэс-службы МЗС, суразмоўцы надалі “актывізацыі гандлёва-эканамічнага супрацоўніцтва і рэалізацыі кааперацыйных праектаў у шэрагу сфер, якія ўяўляюць узаемную цікавасць — аграпрамысловая галіна, навука і тэхналогіі, гуманітарнае вымярэнне”.

Бакі “адзначылі неабходнасць прапрацаваць пытанне запуску прамых авіязносін” паміж сталіцамі Алжыра і Беларусі (“будзе садзейнічаць павелічэнню турыстычных, дзелавых і культурных сувязей паміж двума народамі”), а таксама “ўзаемнага адкрыцця” амбасадаў для “больш шчыльнага ўзаемадзеяння па ўсім спектры пытанняў”.

Міністры “пацвердзілі імкненне актыўна ўзаемадзейнічаць” у сферы харчовай бяспекі ў гэтым афрыканскім рэгіёне.

“Мы рады паведаміць, што першае пасяджэнне беларуска-алжырскай сумеснай камісіі па гандлёва-эканамічным супрацоўніцтве адбудзецца ў 2024 годзе. Акрамя таго, мы дамовіліся правесці наступны раунд беларуска-алжырскіх палітычных кансультацый да красавіка 2025 года”, — падкрэсліў Алейнік.

Дыпламатычныя стасункі паміж дзяржавамі ўсталяваныя ў 1995 годзе.

Паводле даных амбасады Беларусі ў Егіпце, якое сярод іншага адказвае за прадстаўленне інтарэсаў Мінска ў Алжыры, узаемны тавараабарот у 2021 годзе склаў усяго 1,01 млн долараў. Беларусь экспартавала калійныя ўгнаенні, канцылярскія тавары, газетную паперу, пакрыты ці прасякнуты пластмасамі тэкстыль, паставак з Алжыра не было. Статыстыка па гандлі за 2022 і 2023 гады не прыводзіцца.