Лукашэнка мае намер “урэгуляваць пытанне” з беларусамі, якія пакінулі краіну, але прыязджаюць дадому па медпаслугі

2 красавіка, Позірк. Аляксандр Лукашэнка паабяцаў “урэгуляваць пытанне” з беларускімі грамадзянамі, якія пражываюць за мяжой, але прыязджаюць на радзіму для атрымання медыцынскіх паслуг. Такую заяву ён зрабіў 2 красавіка падчас рабочай паездкі ў Гродна, паведамляе яго прэс-служба.

Выступаючы перад сабранымі мясцовымі жыхарамі, Лукашэнка паведаміў пра размову з “былым мэрам Гродна некалькі гадоў таму”.

“Я кажу: “Вось, людзі ў цябе з’язджаюць, чагосьці тут не так”. Ён кажа: “Аляксандр Рыгоравіч, з’язджаць яны з’язджаюць, а вось (даслоўна) зубок вылечыць яны да нас едуць. Там дарагавата”, — сказаў Лукашэнка.

“Я павінен вам сказаць, што мы ўрэгулюем цяпер гэтае пытанне. Нягледзячы на прэзідэнцкія выбары, электаральную кампанію, мы ўрэгулюем, — падкрэсліў Лукашэнка. — Таму што вы павінны разумець: яны зубок прыязджаюць сюды танна лячыць і іншыя хваробы — за ваш кошт. Падаткі вы плаціце як фізічная асоба, і прадпрыемства ваша таксама плаціць падаткі. Яны прыязджаюць танна падлячыцца”.

У верасні 2023 года аб’яднанне былых сілавікоў BelPol паведамляла, што не занятыя ў эканоміцы асобы, унесеныя ў так званую “базу дармаедаў”, у будучыні змогуць праходзіць стацыянарнае лячэнне і атрымліваць стаматалагічную дапамогу толькі на платнай аснове са 100% кампенсацыяй “эканамічна абгрунтаваных выдаткаў”. Выключэннем будуць толькі выпадкі аказання экстраннай медыцынскай дапамогі.

Сцвярджалася, што ўсе дзяржаўныя медустановы будуць падлучаныя да адпаведных інфармацыйных баз для праверкі грамадзян на прадмет іх занятасці ў эканоміцы.

25 студзеня 2018 года быў падпісаны дэкрэт № 1 “Аб садзейнічанні занятасці насельніцтва”, які адкарэктаваў дэкрэт № 3 ад 2 красавіка 2015 года “Аб папярэджанні сацыяльнага ўтрыманства”. У базу “дармаедаў” тады ўнеслі каля паўмільёна чалавек, яна ўвесь час папаўняецца.

Пачынаючы з 1 студзеня 2019 года працаздольныя грамадзяне, не занятыя ў эканоміцы, аплачваюць камунальныя паслугі ў поўным аб’ёме.

Пасля падзей 2020 года з Беларусі, баючыся рэпрэсій, выехалі дзясяткі тысяч чалавек.