Амбасадар Беларусі Круты пагражае пакараннем за невыкананне заданняў па экспарце ў РФ

29 сакавіка, Позірк. Зніжэнне тэмпаў росту экспартных паставак у РФ шэрагу беларускіх прадпрыемстваў у студзені — лютым абмеркавана на анлайн-пасяджэнні міжведамаснай рабочай групы па маніторынгу паставак у гэту краіну.

Як паведаміла прэс-служба беларускага дыппрадстаўніцтва ў РФ, “кожны экспарцёр падрабязна і з лічбамі на руках даў справаздачу па працы на прыярытэтным для Беларусі рынку”.

“Яшчэ раз папрашу дакладна называць колькасць у доларах па пазіцыях <…>, у разрэзе адставання ад тых прагнозных заданняў, якія даведзены, — заявіў амбасадар Дзмітрый Круты. — Тлумачце па канкрэтных прадпрыемствах, якія дапусцілі такое невыкананне, і адразу прапануйце меры, якія будзем выносіць потым на ўзровень урада па выніках першага квартала”.

Круты падкрэсліў, што алгарытм працы “яшчэ раз прагавораны з прэм’ер-міністрам”.

“Я буду ўносіць прапановы па пакаранню членаў нашай рабочай групы, а вы ў сваю чаргу будзеце ўносіць мне прапановы па пакаранню ў першую чаргу супрацоўнікаў маркетынгавых службаў канкрэтных прадпрыемстваў”, — адзначыў кіраўнік дыппрадстаўніцтва.

Паводле слоў Крутога, на зніжэнне тэмпаў безумоўна “ўплывае паслабленне курсу расійскага рубля”, аднак экспартныя заданні, “на жаль, ставяцца не ў фізічных аб’ёмах”.

“Адзінай уважлівай прычынай прасядання застаецца пераарыентацыя патокаў на іншыя рынкі”, — падкрэсліў ён.

Паведамляецца, што таксама на пасяджэнні разгледзелі працу Мінэнерга “па падключэнні да праграмы дагазіфікацыі расійскіх рэгіёнаў”, адзначыўшы, што “дасягнуты поспехі па рэалізацыі праектаў у Смаленскай вобласці”, аднак “для замацавання на гэтым невычэрпным рынку неабходна істотная актывізацыя”.

“У перамовах з Ленінградскай вобласцю пасол рэкамендаваў прапаноўваць рашэнні “пад ключ”, а таксама прапрацоўваць іншыя рэгіёны”, — гаворыцца ў паведамленні. — Асобную ўвагу зноў надалі ўзаемадзеянню з расійскімі дзяржкарпарацыямі, беларускаму ўдзелу ў іх сістэмах закупак, інвестыцыйных праграмах”.

13 лютага на аналагічным пасяджэнні Круты заявіў, што экспарт тавараў у Расію ў 2023 годзе павялічыўся на 9,1%, “без уліку нафты, нафтапрадуктаў і калійных угнаенняў” — на 7,9% “пры заданні” 6,5%.

Паводле слоў дыпламата, агульны аб’ём таварных паставак у Расію склаў “гістарычныя 25 млрд долараў”.

11 лютага ў эфіры тэлеканала АНТ Крутой заявіў, што заходнія санкцыі паслужылі “трыгерам росту паставак” беларускіх тавараў на расійскі рынак.