By_Help: За рэгулярныя данаты фондам дапамогі беларусам можа пагражаць справа аб здрадзе дзяржаве

27 лютага, Позірк. За рэгулярныя ахвяраванні фондам дапамогі беларусам можа пагражаць крымінальная справа аб здрадзе дзяржаве, паведаміў фонд салідарнасці By_Help.

“Мы атрымліваем далейшыя паведамленні, што тым, хто данаціў байполу (аб’яднанне былых сілавікоў ByPol, летам 2023 года падзялілася на ByPol і BelPol. — “Позірк”.) або рэгулярна й шмат іншым фондам дапамогі, цяпер пагражае не выплата адкупных у стакратным памеры, а адразу справа аб здрадзе рэжыму — гэта да пятнаццаці гадоў у турме”, — паведаміў By_Help.

Фонду вядома ўжо не пра адзін выпадак, “калі данацёру шыюць менавіта такі артыкул”. 

“Калі вы данацілі байполу — або шмат і рэгулярна іншым фондам дапамогі — адзіным спосабам забясьпечыць сябе будзе выезд”, — заклікаў By_Help.

У найбліжэйшы час “Позірк” апублікуе каментар кіраўніка BY_Help Аляксея Лявончыка.