Трэцяе аддзяленне Расійскага цэнтра навукі і культуры плануецца адкрыць у Гродне

31 студзеня, Позірк. Аддзяленне Расійскага цэнтра навукі і культуры (РЦНК), які размешчаны ў Мінску, можа адкрыцца ў Гродне да Дня яднання народаў Беларусі і Расіі, які адзначаецца 2 красавіка, паведаміў ТАСС са спасылкай на кіраўніка Федэральнага агенцтва па справах СНД, суайчыннікаў, якія жывуць за мяжой, і па міжнародным гуманітарным супрацоўніцтве (Рассупрацоўніцтва) Яўгена Прымакова.

Паводле яго слоў, на гэта атрымана дзяржаўнае бюджэтнае фінансаванне РФ.

Паводле інфармацыі на сайце агенцтва, аддзяленне ў Гродне стане трэцім у Беларусі пасля ўжо дзейных у Брэсце і Гомелі.

11 снежня 2023 года ў Гродне адкрыўся навучальны клас, абсталяваны пры падтрымцы Россупрацоўніцтва на базе культурна-адукацыйнага цэнтра “Фестывальны”. Паводле інфармацыі расійскага боку, клас прызначаны для правядзення мерапрыемстваў “па рускай мове і літаратуры, беларуска-рускай гісторыі і культуры”.

Рассупрацоўніцтва пазіцыянуе сябе як вядучае расійскае агенцтва, галоўная місія якога — “узмацненне гуманітарнага ўплыву Расіі ў свеце”. Арганізацыя прадстаўлена ў 62 краінах свету 73 замежпрадстаўніцтвамі.

Разам з тым, яно актыўна займаецца прапагандай палітыкі Крамля і актыўна прасоўвае ў Беларусі афіцыйныя наратывы, звязаныя з вайной.

У прыватнасці, яно выступіла партнёрам у арганізацыі фотавыставы аб “злачынствах кіеўскага рэжыму” на мінулым тыдні ў філіяле Расійскага дзяржаўнага сацыяльнага ўніверсітэта ў Мінску.