Мінгарсуд ліквідаваў пратэстанцкую царкву “Новае жыццё”

17 кастрычніка, Позірк. Мінскі гарадскі суд 17 кастрычніка ліквідаваў рэлігійную супольнасць хрысціянаў поўнага евангелля “Новае жыццё”, паведамляе тэлеграм-канал ініцыятывы “Хрысціянская візія”.

Рашэнне па іску, які 15 верасня падаў Мінгарвыканкам, прыняла суддзя Таццяна Дарашчонак.

У іску, паводле інфармацыі ініцыятывы, сцвярджалася, што царква яшчэ ў 2004 годзе не прайшла перарэгістрацыю ў адпаведнасці з законам “Аб свабодзе сумлення і рэлігійных арганізацыях” ад 2002 года, а таксама ажыццяўляла дзейнасць, якая выходзіць за рамкі яе статута.

Неабходнасць ліквідаваць царкву таксама была аргументаваная тым, што асобныя інфармацыйныя рэсурсы “Новага жыцця” прызнаныя “экстрэмісцкімі матэрыяламі”.

Пастар царквы Вячаслаў Ганчарэнка настойвае, што прычыны недастаткова важкія для ліквідацыі супольнасці. Паводле яго слоў, калі ў 2004 годзе царква падала заяўку на перарэгістрацыю, улады яе адхілілі.

Царква “Новае жыццё” была заснаваная ў 1992 годзе. Улады пераследавалі яе ад пачатку 2000-х.

Пасля прэзідэнцкіх выбараў 2020 года Ганчарэнка асудзіў гвалт сілавікоў у дачыненні да пратэстоўцаў. У лютым 2021-га царкву прымусова выселілі з культавага будынка, у які вернікі пераабсталявалі былы кароўнік. Людзі маліліся на двары і ў анлайн-фармаце.

У верасні 2022 года пастара затрымалі і аштрафавалі на 100 базавых велічыняў (на той момант 3,2 тыс. рублёў).

20 чэрвеня 2023-га стала вядома пра знос будынку царквы. На гэтым месцы нібыта плануецца пабудаваць школу. Пасля здарэння Ганчарэнка накіраваў зварот да ўладаў, у якім назваў знос будынка “фатальнай памылкай”, пасля якой “непазбежна будуць наступствы”.

14 жніўня Ганчарэнка і яго зяць Ілля Будай былі затрыманыя і арыштаваныя на 10 і 5 сутак адпаведна, першы — паводле арт. 24.3 КаАП (непадпарадкаванне законнаму распараджэнню або патрабаванню службовай асобы пры выкананні ім службовых паўнамоцтваў), другі — паводле арт. 19.1 КаАП (дробнае хуліганства).

Сёлета 23 жніўня суд Цэнтральнага раёна Мінска прызнаў “экстрэмісцкімі матэрыяламі” кантэнт медыярэсурсаў царквы “Новае жыццё”. Рашэнне прынятае на падставе заявы гарадской пракуратуры. Гаворка ідзе пра публікацыі на старонцы царквы ў “Інстаграме”, а таксама пра датаванае 21 лістапада 2020 года відэа ў “Ютубе” “Пазіцыя хрысціян Царквы “Новае жыццё”. 

31 жніўня суд Маладзечанскага раёна прызнаў “экстрэмісцкімі матэрыяламі” знятае ў 2020 годзе відэа “Пастар Вячаслаў Ганчарэнка асуджае гвалт і заклікае ўладу пакаяцца!”. У спіс таксама ўключаная група “УКантакце” “Царква “Новае Жыццё”. Мінск”.

Дзейнасць незарэгістраваных або ліквідаваных рэлігійных суполак можа пацягнуць за сабой крымінальную адказнасць паводле арт. 1931 Крымінальнага кодэкса і пакаранне ў выглядзе штрафу або пазбаўлення волі на тэрмін да двух гадоў.