У 2023 годзе ў Беларусі паболела на 62 “экстрэмісцкія фармаванні”, сярод якіх 11 медыя — “Вясна”

10 студзеня, Позірк. У 2023 годзе ў Беларусі паболела на 62 “экстрэмісцкія фармаванні”, сведчыць справаздача па выніках маніторынгу праваабарончага цэнтра “Вясна”.

Міністэрства ўнутраных спраў прыняло 35 рашэнняў аб наданні адпаведнага статусу, Камітэт дзяржаўнай бяспекі — 26, Вярхоўны суд — 1.

Цяпер у спісе “экстрэмісцкіх фармаванняў” 169 пазіцый. У 2022 годзе адпаведны статус атрымалі 80 арганізацый, за два месяцы 2021 года, калі пачало дзейнічаць адпаведнае заканадаўства, — 27.

З 2021 года за “стварэнне экстрэмісцкага фармавання або ўдзел у ім” (арт. 361¹ КК) асудзілі сама меней 130 чалавек. Паводле інфармацыі праваабаронцаў, гэты артыкул, як правіла, выкарыстоўваюць у абвінавачванні ў сукупнасці з іншымі крымінальнымі артыкуламі.

Аўтары справаздачы звяртаюць увагу на тое, што летась улады дадалі ў пералік 11 медыя і 5 блогераў, музычны гурт Tor Band, “Вясну”, Беларускую асацыяцыю журналістаў, Задзіночанне беларускіх студэнтаў, дзве буйныя суполкі салідарнасці, шэраг іншых грамадскіх аб’яднанняў і суполак.