Экс-прэм’ер Вялікабрытаніі Джонсан заклікаў браць шэфства над беларускімі палітвязнямі

16 кастрычніка, Позірк. Былы прэм’ер-міністр Вялікабрытаніі Борыс Джонсан заклікаў звярнуць увагу на лёс палітвязня Сяргея Ціханоўскага і ўсіх палітвязняў Беларусі. Аб гэтым ён заявіў 16 кастрычніка ў відэазвароце ў “Інстаграме”

Паводле словаў палітыка, ён падтрымаў кампанію дэмакратычнага лідара Святланы Ціханоўскай “па прыцягненні ўвагі да праблемы палітычных зняволеных у Беларусі” і пагадзіўся стаць сімвалічным хросным яе мужа Сяргея Ціханоўскага, які знаходзіцца ў турме.

“Прывітанне, сябры! Жадаю звярнуць вашу ўвагу на лёс вельмі адважнага чалавека. Сяргея Ціханоўскага, які па праве павінен быць абраным лідарам Беларусі, але замест гэтага ён пасаджаны ў турму карумпаваным тыранам, які кіруе гэтай краінай”, — заявіў Джонсан.

Ён заклікаў тых, хто жадае, далучацца да ягонага “акту салідарнасці”, бо ў Беларусі “налічваецца больш за 1,5 тыс. палітычных зняволеных”.

“Я падтрымліваю мужны народ Беларусі”, — падсумаваў экс-прэм’ер.

16 кастрычніка пачаўся трохдзённы візіт Ціханоўскай у Вялікабрытанію. У праграме — выступленне ў парламенце з праграмнай прамовай, перамовы з міністрам замежных спраў Джэймсам Клеверлі, сустрэчы з былымі прэм’ер-міністрамі Тоні Блэрам і Тэрэзай Мэй, удзел у беларуска-брытанскім форуме ў Лонданскім універсітэце Саўт Бэнк, сустрэча з дыяспарай, брыфінг для дыпламатаў.