Карпенка запрасіў расійскіх калег паназіраць за адзіным днём галасавання
30 лістапада, Позірк. Старшыня Цэнтральнай выбарчай камісіі (ЦВК) Беларусі Ігар Карпенка падчас сустрэчы ў Санкт-Пецярбургу перадаў запрашэнне дэлегацыі ЦВК Расіі ўзяць удзел у назіранні за правядзеннем у лютым 2024 года адзінага дня галасавання на парламенцкіх і мясцовых выбарах, паведамляе ТАСС.
26 лістапада ў эфіры тэлеканала АНТ Карпенка заяўляў аб намеры запрасіць у якасці назіральнікаў на выбары 25 лютага 2024 года прадстаўнікоў цэнтрвыбаркамаў краін СНД, а таксама “калег з Сусветнай асацыяцыі выбарчых органаў”.
Гаворачы аб верагоднасці прысутнасці місіі наглядальнікаў АБСЕ, кіраўнік ЦВК адзначыў, што “мы як бы не супраць гэтай арганізацыі, знаходзімся ў ёй, узаемадзейнічаем”, аднак пры гэтым не раз узнімалася пытанне, што “трэба выпрацаваць нейкія адзіныя стандарты, якія б прымяняліся ўсюды аднолькава”.
25 лютага 2024 года ў Беларусі ўпершыню пройдуць аб’яднаныя выбары ў Палату прадстаўнікоў і мясцовыя саветы.
Падчас выбараў будзе забаронена фатаграфаваць і выкладваць у інтэрнэт запоўнены бланк бюлетэня — як падчас датэрміновага галасавання, так і ў дзень выбараў. За парушэнне гэтага патрабавання пагражае адміністрацыйная адказнасць.
У 2020 годзе на прэзідэнцкіх выбарах многія выбаршчыкі фатаграфавалі свае бюлетэні і адпраўлялі на электронную платформу “Голас”, што стала адным са сведчанняў фальсіфікацыі ўладамі вынікаў галасавання на карысць Аляксандра Лукашэнкі.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.
