У віцебскай калоніі памёр актывіст і блогер Мікалай Клімовіч, які баяўся за сваё жыццё ў няволі з-за праблем са здароўем

7 траўня, BPN. У папраўчай калоніі № 3 у пасёлку Віцьба (Віцебскі раён) памёр актывіст і блогер з інвалідасцю 2-й групы Мікалай Клімовіч.

Інфармацыю пра гэта 7 траўня яго сваякам перадалі падчас тэлефанавання з калоніі, паведаміла BPN крыніца, якая пажадала застацца ананімнай.

Цела можна будзе забраць пасля 9 траўня.

Абставіны і прычыны смерці пакуль невядомыя.

Сёлета 28 лютага суд Пінскага раёна і Пінска прыгаварыў Клімовіча да аднаго года пазбаўлення волі па арт. 368 Крымінальнага кодэкса — за “абразу” Аляксандра Лукашэнкі. Ён паставіў знак “смешна” пад ілюстрацыяй, дзе Лукашэнка і Уладзімір Пуцін былі ў нацысцкай форме.

Блогера ўзялі пад варту ў зале суда: да вынясення прыгавора ён быў на волі з-за кепскага стану здароўя пасля аперацыі на сэрцы і інсульта. 21 красавіка Брэсцкі абласны суд мусіў разгледзець апеляцыю Клімовіча. Вынік пасяджэння невядомы.

“Я спадзяваўся і шмат хто, што прысуд абмяжуецца “хатняй хіміяй” (абмежаванне волі па месцы жыхарства. — BPN.). Але пракурор запрасіў год калоніі агульнага рэжыму”, — распавёў BPN Клімовіч перад вынясеннем прысуду.

Гэта, паводле словаў абвінавачанага, “быў для ўсіх шок”, улічваючы стан яго здароўя.

Яму таксама інкрымінавалі арт. 19.11 КаАП (распаўсюд экстрэмісцкай інфармацыі) і 361⁴ КК (садзейнічанне экстрэмісцкай дзейнасці), але пасля праверкі гэтыя артыкулы былі знятыя.

Падчас працэсу адвакат распавёў пра стан здароўя падабароннага, падкрэсліваў небяспеку турэмнага тэрміну для яго. “Любое турэмнае знявольванне для мяне — гэта смерць, таму што я павінен быць пад сталым наглядам урача, прымаць вялікую колькасць моцных лекаў. Я магу не вытрымаць нават месяца”, — папярэдзіў сам Клімовіч.

Ён падкрэсліў, што займае антываенную пазіцыю і з гэтым звязаныя ягоныя публікацыі ў сацыяльных сетках.

Інсульт і складаную аперацыю на сэрцы Клімовіч, які ў сацсетках падпісваўся Мікалаем Вераснем, перанёс летась у траўні. Праз сем месяцаў, у снежні, за рэакцыю “смешна” пад карыкатурай на Пуціна ў нацысцкай форме яго затрымалі. Тады ў ізалятар часовага ўтрымання выклікалі хуткую дапамогу, дактары завезлі Клімовіча ў лякарню. Пазней ён быў аштрафаваны на 111 рублёў (3 базавыя велічыні).

Два дні таму, 5 траўня, Клімовіч быў уключаны ў спіс “асоб, якія маюць дачыненне да экстрэмісцкай дзейнасці”.

21 траўня 2021 года ў шклоўскай калоніі пры невядомых абставінах раптоўна памёр актывіст з Лідскага раёна Вітольд Ашурак, асуджаны на пяць гадоў пазбаўлення волі.