Лукашэнка прызнаў увод з Беларусі ва Украіну 20-тысячнай расійскай групоўкі

21 ліпеня, BPN. З Беларусі ва Украіну была ўведзена 20-тысячная групоўка расійскіх войск. Такое прызнанне зрабіў Аляксандр Лукашэнка ў інтэрв’ю французскаму інфармацыйнаму агенцтву “Франс Прэс” 21 ліпеня.

“Расіяне наносілі ўдар сваімі ракетамі, па-мойму, “Іскандэрамі”, я не памятаю, для таго каб засцерагчы ад небяспекі свае падраздзяленні. І тады яны ўвялі 20 тыс. сваіх хлопцаў, войскаў, з тэрыторыі Беларусі, якія былі на вучэннях. Гэта Усходняя акруга, нават не Заходняя. Гэта вунь з Іркуцка і Далёкага Усходу ўзброеныя сілы былі. І яны вымушаны былі іх увесці туды. Вось чаму з нашай тэрыторыі”, — сказаў Лукашэнка.

“Але гэта не значыць, яшчэ раз кажу, што я апраўдваюся, — заявіў ён. — Я падтрымліваю Расію ў тым, што яны вас (НАТО. — BPN.) апярэдзілі. Калі б вайскоўцы Расіі прамаргалі гэты момант, яны вымушаны былі б сустрэць масіраваны ўдар з боку войскаў НАТО — не Украіны. Зараз не Украіна ваюе. Зараз вы там ваюеце. Вашы найміты і ваша зброя. Дык вы ж яшчэ большыя агрэсары, чым я… Вы большыя агрэсары, натаўцы, чым Беларусь”.

Расійская агрэсія супраць Украіны пачалася 24 лютага. Кіеўская і Чарнігаўская вобласці, якія мяжуюць з Беларуссю, былі часткова акупаваны. У канцы сакавіка — пачатку красавіка Украіна аднавіла кантроль над захопленымі тэрыторыямі.

(Выкарыстаны відэафрагмент інтэрв’ю, размешчаны ў блізкім да Лукашэнкі тэлеграм-канале “Пул Першага”.)