У Літве затрымалі сем чалавек, у тым ліку памежнікаў, па справе аб кантрабандзе цыгарэт з Беларусі

8 верасня, Позірк. Сем чалавек, у тым ліку трое супрацоўнікаў Службы аховы дзяржаўнай мяжы (САДМ) пры МУС Літвы, затрыманыя ў рамках расследавання аб незаконным абароце падакцызных тавараў, паведаміла служба.

Аперацыя была праведзена ў ноч на 7 верасня і раніцай таго ж дня. Нагодай для яе пачатку стала затрыманне ў Лаздзiйскім раёне каля мяжы з Беларуссю грузу з 22 каробак з цыгарэтамі беларускай вытворчасці, як мяркуецца, дастаўленымі з дапамогай дронаў.

Каля каробак памежнікі таксама затрымалі двух чалавек, якія прыехалі на аўтамабілі, каб забраць нелегальны груз, іншыя службы — двух малодшых спецыялістаў Капчамесціскай памежнай заставы, якія знаходзіліся пры выкананні службовых абавязкаў.

Амаль адначасова ноччу іншая група супрацоўнікаў САДМ у Валкінінкаі затрымала яшчэ двух чалавек, якія, як мяркуецца, арганізавалі перавозку кантрабанды. Раніцай у Варэне на працоўным месцы затрыманы галоўны следчы Варэнскай памежнай каманды, гаворыцца ў рэлізе.

Расследаванне праводзіцца Пагегяйскай памежнай камандай САДМ пад кіраўніцтвам пракурора трэцяга аддзела крымінальнага пераследу Каўнаскай акруговай пракуратуры.

Ад пачатку 2026 года па выніках яго расследаванняў падазрэнні ў карупцыйных злачынствах прад’яўленыя чатыром супрацоўнікам САДМ. У 2025 годзе такіх выпадкаў было два, у 2024-м — пяць.