Міграцыйны ціск у жніўні знізіўся на Латвію і Польшчу, вырас на Літву — аналіз

Апублікавана на адкрытай версіі “Позірку” 2 верасня 2026 года ў 10:30

1 верасня, Позірк. 1.741 спробу парушэння мяжы зафіксавалі ў жніўні 2026 года суседнія краіны Еўрасаюза, вынікае з праведзенага “Позіркам“ аналізу масіва аператыўных звестак іх памежных службаў.

У параўнанні з ліпенем міграцыйны ціск знізіўся на Латвію (1.375 спробаў супраць 2.275, або ў 1,7 раза менш) і Польшчу (54 супраць 106, або ў 2 разы менш), вырас на Літву (312 супраць 163, або ў 1,9 раза).

Агульная колькасць спробаў нелегальнай міграцыі з тэрыторыі Беларусі ў жніўні аказалася найменшай за апошнія пяць месяцаў. У ліпені іх было 2.544, у чэрвені — 2.439, у траўні — 2.583 (месячны рэкорд сёлета), у красавіку — 2.195.

З пачатку года адзначана 12.171 спроба пранікнення ў ЕС праз Беларусь. На долю Латвіі прыйшлося 85,7% (10.435), Літвы — 11,1% (1.347), Польшчы — 3,2% (389).

У жніўні 2025 года ў параўнанні са жніўнем 2026-га актыўнасць мігрантаў была вышэйшай у 3,8 раза (6.685 спробаў), за восем месяцаў 2025-га ў параўнанні з васьмю месяцамі 2026-га — у 2,8 раза (34.045). Найбольшая доля была ў Польшчы — 69,9% (23.790), пры гэтым у жніўні на польскім напрамку быў рэкорд года — 5.340 спробаў.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.