29 жніўня, Позірк. Старшыня Палаты прадстаўнікоў Нацыянальнага сходу Ігар Сергеенка і амбасадар Грузіі ў Беларусі Гіоргі Саганелідзэ сустрэнуцца 31 жніўня ў Мінску, сведчыць графік працы на сайце ніжняй палаты беларускага парламента.
Парадак дня не пазначаны.
26 траўня Аляксандр Лукашэнка, віншуючы прэзідэнта Грузіі Міхеіла Кавелашвілі з Днём незалежнасці, выказаў спадзеў на “актывізацыю ўсебаковага ўзаемадзеяння” дзвюх краін, у тым ліку ў гандлёва-эканамічнай, гуманітарнай і культурнай сферах.
У апошнія гады Мінск імкнецца развіваць стасункі з Тбілісі і, мяркуючы па ўсім, гэта ўзаемна.
27 жніўня 2026 года міністр аховы здароўя Аляксандр Хаджаеў абмеркаваў з Саганелідзэ перспектывы развіцця супрацы ў сферы медыцыны. Прадстаўнік уладаў Грузіі на сустрэчы заявіў, што ў гэтай сферы “трэба пракладваць новыя сцежкі, наводзіць масты, каб стала кантактаваць і абменьвацца досведам”.
10 жніўня амбасадар Беларусі Мікалай Рагашчук абмяняўся меркаваннямі з кіраўніком адміністрацыі ўрада Грузіі Леванам Жаржаліяні “па актуальных пытаннях беларуска-грузінскага ўзаемадзеяння”. Бакі абмеркавалі “патэнцыял для далейшага нарошчвання тавараабароту, пашырэння ўзаемных паставак запатрабаванай прадукцыі, а таксама прасоўвання перспектыўных эканамічных праектаў”. Акрамя таго, гаворка ішла пра развіццё “міжведамаснага ўзаемадзеяння, у тым ліку супрацу праваахоўных ведамстваў” дзвюх краін.
22 ліпеня Рагашчук сустракаўся са старшынёй камітэта па міжнародных стасунках парламента Грузіі Нікалозам Самхарадзе. Абмяркоўваліся двухбаковыя стасункі, гандаль, міжпарламенцкая супраца.
Беларуска-грузінскі бізнес-форум адбыўся 5 чэрвеня ў рамках выставы “Белагра-2026” у Мінску.
У сярэдзіне сакавіка намеснік прэм’ер-міністра Беларусі Юрый Шулейка сустрэўся ў Тбілісі з кіраўніком грузінскага ўрада Іракліем Кабахідзэ. На перамовах суразмоўцы разгледзелі “актуальныя пытанні двухбаковага партнёрства, у тым ліку ў гандлёва-эканамічнай сферы”.
У гэты ж час намеснік міністра замежных спраў Беларусі Павел Уцюпін сустрэўся са сваім грузінскім калегам Аляксандрам Хвцісіяшвілі. Бакі абмяркоўвалі двухбаковыя стасункі, гандлёва-эканамічную супрацу ды інш.
Сёлета ў лютым Рагашчук абмяркоўваў з намеснікам міністра аховы навакольнага асяроддзя і сельскай гаспадаркі Грузіі Лашам Аваліяні пытанні жывёлагадоўлі, раслінаводства і доступу беларускіх прадуктаў на грузінскі рынак. З міністрам рэгіянальнага развіцця Кахаберам Гуледані дыпламат з Мінска абмяркоўваў міжрэгіянальныя сувязі, абмен дэлегацыямі гарадоў і рэгіёнаў, а таксама эканамічную супрацу.
Грузія стала адной з асноўных краін знаходжання беларусаў, якія ўцяклі ад пераследу рэжыму Аляксандра Лукашэнкі ў 2020 годзе і пазней. У той жа час мясцовыя ўлады не задаволілі ніводнага іх хадайніцтва аб наданні прытулку. З дэмакратычнымі сіламі Беларусі Грузія фактычна не супрацоўнічае.
У 2025 годзе мясцовыя ўлады пастрожылі міграцыйнае заканадаўства — пасля затрымання замежнікаў, найперш грамадзян РФ, якія ўдзельнічалі ў масавых акцыях пратэсту супраць фальсіфікацыі вынікаў парламенцкіх выбараў 2024 года і адмовы кіроўнай прарасійскай партыі “Грузінская мара” ад курсу на збліжэнне з Еўрасаюзам. Сярод затрыманых быў беларус Яўген Муравіцкі, у якога пасля вызвалення атрымалася вылецець у Літву.
