Кіраўнік МУС патрабуе ад падначаленых кантраляваць настроі на прадпрыемствах і групавыя чаты

30 ліпеня, Позірк. “Адсочванне настрояў на прадпрыемствах, кантроль за зместам групавых чатаў — гэта сёння актуальна”, — гаворыцца ў рэлізе МУС аб ходзе камандна-штабных вучэнняў ведамства ў Гродзенскай вобласці 30 ліпеня са спасылкай на яго кіраўніка Івана Кубракова.

Паведамляецца, што першы этап вучэнняў адбыўся на базе абласнога УУС, дзе чыноўнік даў даручэнне “максімальна задзейнічаць” магчымасці Рэспубліканскай сістэмы маніторынгу грамадскай бяспекі (РСМГБ), а таксама “ў самыя кароткія тэрміны сфарміраваць спісы ветэранаў і дружыннікаў, гатовых устаць у строй пры ўскладненні абстаноўкі”.

Падчас другога этапу ўдзельнікі “адпрацавалі найбольш складаныя сцэнары абвастрэння абстаноўкі ў гарадскім асяроддзі і на рэжымных аб’ектах: ад абясшкоджвання суперніка ў закінутым будынку да правядзення кропкавых антытэрарыстычных аперацый пры вялікай колькасцю людзей”.

У Вялікай Бераставіцы прайшоў штурм аб’екта, “дзе схаваліся [легендаваныя] злачынцы, ва ўмовах абмежаванай бачнасці”, паралельна вялася разведка прылеглай тэрыторыі.

У Лідзе міліцыянеры трэніраваліся вызваляць заложнікаў у будынку школы і эвакуіраваць грамадзянскіх асоб.

У вайсковай часці ў Гродне адпрацаваны “захоп сацыяльна-культурнага аб’екта з вялікай колькасцю наведвальнікаў, а таксама масавыя беспарадкі”, для чаго былі задзейнічаны сілы АМАПа, унутраных войскаў МУС, МНС, ваеннаслужачых Заходняга аператыўнага камандавання Міністэрства абароны.

Аб правядзенні 29–30 ліпеня ў рэгіёне комплексных камандна-штабных вучэнняў падраздзяленняў органаў унутраных спраў і ўнутраных войскаў МУС паведаміла напярэдадні УУС аблвыканкама.

Мэтай заяўлена праверка гатоўнасці падраздзяленняў МУС і ўнутраных войскаў да дзеянняў “у асаблівых умовах”.

Сілавікі праводзяць такія трэніроўкі, каб не дапусціць “паўтарэння падзей 2020 года”, заявіў Кубракоў 27 мая падчас комплексных камандна-штабных вучэнняў у Магілёве.

У чэрвені трэніроўкі МУС “з выбухамі і стрэламі” прайшлі ў Рэчыцы (Гомельская вобласць), Віцебску і Баранавічах (Брэсцкая вобласць).

Падчас вучэнняў 23–24 красавіка ў Віцебску паведамлялася, што міліцыя адпрацоўвала “спыненне масавых беспарадкаў”, у тым ліку “з блакіроўкай дарог і барыкадамі”, а таксама “пошук і затрыманне каардынатараў пратэстаў”. Раней вучэнні для праверкі працы “ў асаблівых умовах” прайшлі таксама ў Брэсцкай вобласці.

Масавыя палітычныя рэпрэсіі, якія рэжым Аляксандра Лукашэнкі разгарнуў пасля брутальнага падаўлення пратэстаў, выкліканых фальсіфікацыяй выбараў 2020 года і жорсткасцю сілавікоў, не спыняюцца да гэтага часу.

У выніку дзеянняў супрацоўнікаў сілавых органаў загінулі ўдзельнікі пратэстаў Аляксандр Тарайкоўскі, Генадзь Шутаў (абодва застрэлены), Раман Бандарэнка, Аляксандр Віхор і інш. Адказнасць за гэта ніхто не панёс.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.

На гэтым фоне вучэнні сілавікоў, у тым ліку вайскоўцы, кіруючы рэжым праводзіць практычна няспынна.