Пацярпелы ад пажару гістарычны дом у цэнтры Мінска накрыты часовым дахам
7 ліпеня, Позірк. Завершанае “ўладкаванне часовага даху” на пацярпелым ад пажару сталічным доме на вул. Леніна, 9 у сталіцы, паведамляе агенцтва “Мінск-Навіны” са спасылкай на кіраўніка адміністрацыі Ленінскага раёна Рамана Мельніка.
Пра працэс ліквідацыі наступстваў здарэння ён заявіў 6 ліпеня на выязной нарадзе пад кіраўніцтвам старшыні Мінгарвыканкама Уладзіміра Кухарава.
Паводле яго слоў, цяпер будаўнікі займаюцца аварыйна-аднаўленчымі работамі: “Канчаткова вызваляюць паддахавую прастору ад уцяпляльніка, згарэлых і пашкоджаных канструкцый, каб максімальна аператыўна пачаць узвядзенне сталага даху”.
Мельнік адзначыў, што праз пажар перагледжаны графік выканання капрамонту будынка: “У 2026 годзе будзе распрацаваная праектная дакументацыя, а сам капітальны рамонт плануем распачаць ужо ў 2027-м”. Ён не ўдакладніў, якім быў ранейшы графік.
Намесніца генеральнага дырэктара вытворчага аб’яднання “Мінскбуд” Вольга Кузняцова ў сваю чаргу паведаміла, што “9 ліпеня замоўца паставіць на аб’ект першыя канструкцыі для кроквеннай сістэмы”. “Далей у адпаведнасці з праектнай дакументацыяй распачнём узвядзенне сталага даху. Будаўнікі працуюць ад 8 ранку да 11 вечара, бо стаіць задача завяршыць пачатае ў максімальна сціслыя тэрміны”, — сказала яна.
Намесніца кіраўніка арганізацыі адзначыла, што з 29 чэрвеня з месца пажару было вывезена каля 1.400 кубаметраў будаўнічых адкідаў.
Як паведамляў “Позірк“, тушэнне буйнога пажару, які ўзнік увечары 28 чэрвеня на гарышчы шасціпавярховага жылога дома па вуліцы Леніна, 9 у цэнтры Мінска, працягвалася каля васьмі гадзін. Тушэнне агню ўскладнялася спякотным надвор’ем (каля 30 градусаў вышэй за нуль на момант узгарання).
Згодна з паведамленнямі МНС і Мінгарвыканкама, плошча пажару спачатку ацэньвалася ў 400, пасля больш як у 1.000 кв. метраў. Было задзейнічана 13 адзінак тэхнікі і 53 работнікі МНС, пазней прыбыла яшчэ 14 адзінак тэхнікі і каля 70 работнікаў ведамства, прыцягваўся Рэспубліканскі атрад спецыяльнага прызначэння “Зубр” МНС. Быў задзейнічаны дрон з цеплавізарам.
Выратавана тры чалавекі, эвакуявана пяць; загінулых няма.
Пацярпелы дом — помнік сталінскай архітэктуры 1950-х гадоў. Паколькі ён з’яўляецца гісторыка-культурнай каштоўнасцю 3-й катэгорыі, вызначаны навуковы кіраўнік праекта па яго аднаўленні. Прэс-служба Мінгарвыканкама, якая паведаміла пра гэта 29 чэрвеня, не ўдакладніла, пад чыім менавіта навуковым кіраўніцтвам будзе адноўлены будынак.
