Амбасадар Чарнагор: У выпадку эскалацыі небяспека на тэрыторыі Беларусі будзе знішчаная дыстанцыйным шляхам

26 чэрвеня, Позірк. Амбасадар МЗС Украіны па асаблівых даручэннях, які адказвае за сувязі з беларускімі дэмсіламі, Яраслаў Чарнагор выключае ўвод украінскіх войскаў на тэрыторыю Беларусі “ў выпадку эскалацыі“.

“Нам чужая тэрыторыя не патрэбная. Трэба ліквідаваць небяспеку. Таму нашы жаўнеры будуць знаходзіцца на ўкраінскім баку мяжы, а небяспека будзе знішчаная і ліквідаваная тым спосабам, які вайсковае кіраўніцтва палічыць патрэбным, дыстанцыйным шляхам“, — заявіў ён у інтэрв’ю Deutsche Welle.

“Калі хтосьці думае, што вайна Украіны з Беларуссю — гэта тое, чаго мы хочам, то не. Мы гэтага не хочам. Але калі сітуацыя складзецца так, што з тэрыторыі Беларусі для нас будзе зыходзіць высокі ўзровень небяспекі, то, думаю, паўтарэння 2022 года не будзе — калі ўкраінскія ўлады дзеля канцэнтрацыі сіл на ўсходзе і поўдні, па сутнасці, замарозілі вайну на поўначы“, — сказаў дыпламат.

Закранаючы тэму рэтранслятараў для навядзення дронаў РФ на беларускай тэрыторыі, Чарнагор заявіў, што раней яны ўжо былі знішчаныя Кіевам, тэма не ўздымалася ў публічнай прасторы, аднак Крэмль зноў усталяваў аналагічнае абсталяванне.

Таксама прадстаўнік Кіева ўдакладніў, што з юрыдычнага пункту гледжання Мінску ультыматум не высоўваўся.

На пытанне аб супрацьдзеянні пастаўкам у РФ беларускага паліва амбасадар заўважыў, што з Менскам “праца будзе весціся як на міжнародным узроўні, так і <…> па дыпламатычных каналах“.

“Думаю, ужо неаднаразова гучала і мы пацвердзілі, што ў нас ёсць пэўныя сярэдне- і далёкабойныя санкцыі, якія прымяняюцца па тэрыторыі РФ. Магчыма, і гэтым разам мы задзейнічаем такія захады і проста перакрыем магчымасці экспарту з Беларусі ў Расію тых тавараў, якія шкодзяць нашай абароне“, — дадаў ён, імаверна, маючы на ўвазе кропкавае знішчэнне з дапамогай дронаў і ракет транспарту з грузамі на расійскай тэрыторыі.

19 чэрвеня прэзідэнт Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення расійскіх дронаў уздоўж мяжы з Украінай: “Калі ён гэта не зробіць, зробім мы“. Палітык таксама заклікаў спыніць пастаўку нафтапрадуктаў расійскай арміі.

На наступны дзень у звароце да суайчыннікаў ён заявіў, што Украіне вядома “аб чатырох такіх рэтранслятарах у Беларусі — у Гомельскай і Брэсцкай абласцях“, і паўтарыў, што ў Беларусі “ёсць час, каб дэмантаваць гэтае абсталяванне“.

24 чэрвеня Зяленскі паведаміў, што абсталяванне спыніла працу двума днямі раней: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі ўважліва сачу і штодзённыя справаздачы атрымліваю. Факт, што рэтранслятары на сёння не працуюць”.

Днём пазней кіраўнік украінскай дзяржавы запатрабаваў спыніць развіццё памежнай інфраструктуры агрэсіі з боку Мінска.

“Уздоўж нашай дзяржаўнай мяжы ў Беларусі завяршаецца будаўніцтва інфраструктуры дарог і баз захоўвання боепрыпасаў і гаруча-змазачных матэрыялаў, якія не маюць ніякага іншага сэнсу, акрамя вайскоўца“, — напісаў палітык у сваім тэлеграм-канале.

Паводле яго слоў, беларускія ўлады атрымалі “неабходныя сігналы наконт такой дзейнасці, а таксама наконт усіх іншых фарматаў яе супрацоўніцтва з Расіяй у інтарэсах зацягвання і маштабавання вайны”.

Гл. таксама:

Зеленский продолжает давить на Лукашенко, однако белорусским Маннергеймом тот не станет (на рускай мове)