Рыжанкоў абмеркаваў санкцыі супраць беларускага калію з кіраўніком харчовай арганізацыі ААН

2 чэрвеня, Позірк. Зацікаўленасць у супрацоўніцтве з Харчовай і сельскагаспадарчай арганізацыяй Аб’яднаных Нацый (ФАО) выказаў міністр замежных спраў Максім Рыжанкоў, паведамляе прэс-служба знешнепалітычнага ведамства.

2 чэрвеня ў Мінску прайшла сустрэча Рыжанкова з генеральным дырэктарам ФАО Цюй Дун’юем. Бакі, як адзначаецца, абмеркавалі “стан і перспектывы” супрацоўніцтва Беларусі з ФАО, а таксама “месца і ролю арганізацыі ў забеспячэнні харчовай бяспекі“.

Кіраўнік МЗС падкрэсліў важнасць узаемадзеяння з ФАО, якая “прадастаўляе экспертную падтрымку Беларусі ў сферах сельскай, лясной і рыбнай гаспадаркі, аховы навакольнага асяроддзя“. Рыжанкоў “выказаў надзею на больш хуткае завяршэнне работы па ўзгадненні краінавай праграмы супрацоўніцтва на 2026–2030 гады“.

Адзначаецца, што асаблівая ўвага на сустрэчы была нададзена “пытанню санкцыйных абмежаванняў у дачыненні да экспарту беларускіх калійных угнаенняў“.

Паведамляецца таксама аб сустрэчы Рыжанкова з міністрам сельскай гаспадаркі, рыбалоўства і водных рэсурсаў Амана Саудам Хамудам аль-Хабсі.

Бакі абмеркавалі “выкананне дамоўленасцяў, дасягнутых у ходзе перамоў на вышэйшым і высокім узроўнях, а таксама пратакола першага пасяджэння Беларуска-Аманскага міжурадавага камітэта па супрацоўніцтве і інвестыцыях, якое прайшло 1–2 красавіка 2026 года ў Маскаце“, адзначае МЗС.

“З задавальненнем адзначылі поспехі ў рэалізацыі сумесных праектаў па пастаўках дзіцячага харчавання, сушцы малака і пацвердзілі важнасць выкарыстання магчымасцяў Амана для прасоўвання беларускіх прадуктаў у іншыя краіны рэгіёна, а таксама ва Усходнюю Афрыку і Індыю. Прымаючы пад увагу той факт, што сектар сельскай гаспадаркі з’яўляецца адной з фундаментальных апор беларускай эканомікі і адыгрывае значную ролю ў нацыянальнай гаспадарцы Амана, падкрэслілі неабходнасць працягу сумеснай працы ў гэтай сферы ў мэтах рэалізацыі наяўнага патэнцыялу“, — гаворыцца ў рэлізе.

1 чэрвеня паведамлялася, што Аляксандр Лукашэнка заявіў пра ўзаемасувязь уведзеных у дачыненні да Беларусі “аднабаковых санкцый“ і ” абвастрэння харчовай праблемы, што назіраецца ў свеце”. Прымаючы Цюй Дун’юя, ён сказаў: “Мы [ў свеце] сёння адчуваем і дэфіцыт асабліва мінеральных угнаенняў, якія, натуральна, спрыяюць росту ўраджайнасці тых ці іншых культур, асабліва пшаніцы, кукурузы. І ў сілу гэтага харчовая праблема абвастраецца. Вы павінны ведаць, што мы гатовыя зрабіць свой унёсак у забеспячэнне спажыўцоў у свеце і тых, хто мае патрэбу, мінеральнымі ўгнаеннямі”.

Паколькі, як сцвярджалася, 20% усіх мінеральных угнаенняў у свеце вырабляецца беларускімі прадпрыемствамі, Лукашэнка заявіў, што “ўсялякія санкцыйныя абмежаванні, усялякая спроба ізаляваць Беларусь ад сусветнага рынку мінеральных угнаенняў контрпрадуктыўная і вельмі негатыўна ўплывае на забеспячэнне людзей планеты прадуктамі харчавання”.

Па выніках сустрэчы з амерыканскай дэлегацыяй 19 сакавіка ў Мінску Лукашэнка памілаваў 250 вязняў, з якіх 235 дазволена застацца на радзіме, а 15 было вывезена ў Літву (трое пасля накіраваліся ў Польшчу). У адказ адміністрацыя прэзідэнта ЗША Дональда Трампа паабяцала зняць у Беларусі частку санкцый (з “Белінвестбанка“, Банка развіцця, Міністэрства фінансаў, “Беларуськалія“, Беларускай калійнай кампаніі).

Упраўленне па кантролі за замежнымі актывамі Міністэрства фінансаў ЗША (OFAC) 26 сакавіка афіцыйна зняло абмежаванні з “Беларуськалія“ і Беларускай калійнай кампаніі (БКК).

Разам з тым аднавіць пастаўкі ўгнаенняў праз Клайпедскі порт у Літве па-ранейшаму немагчыма, паколькі ў дачыненні да згаданых кампаній дзейнічаюць санкцыі Еўрасаюза.

Аб магчымым супрацоўніцтве з Беларуссю па рэалізацыі ініцыятывы “Харчовы кошык будучыні“ заявіў на сустрэчы са старшынёй праўлення Нацбанка Раманам Галоўчанкам дырэктар па інвестыцыях Аманскага інвестыцыйнага агенцтва (АІА) Ібрагім Аль-Эйсры 9 красавіка ў Мінску.

Паводле яго слоў, праект рэалізуецца пад стратэгічным кіраўніцтвам прэзідэнта АІА Абдэльсалама аль-Муршыдзі і стаў для яго “асабістым прыярытэтам“.

“Прымаючы пад увагу, што Беларусь валодае багатымі зямельнымі і воднымі рэсурсамі, мы плануем развіваць маштабныя праекты, здольныя не толькі аб’яднаць нашы краіны, але і забяспечыць значны камерескі эфект для ўсіх удзельнікаў“, — заявіў Аль-Эйсры.

ФАО — спецыялізаваная арганізацыя ААН, якая ўзначальвае міжнародныя намаганні па барацьбе з голадам. Яе мэта палягае ў тым, каб забяспечыць харчовую бяспеку для ўсіх і гарантаваць рэгулярны доступ насельніцтва да высакаякаснай ежы.