Райвыканкамы атрымалі права вымаць зямельныя ўчасткі ў інтарэсах дзяржавы

2 траўня, Позірк. Раённыя выканаўчыя камітэты атрымалі паўнамоцтвы прымаць рашэнні, каб вымаць ці надаваць зямельныя ўчасткі для будаўніцтва аб’ектаў “у інтарэсах рэгіёну або дзяржавы”. Адпаведнае права замацаванае ў законе “Аб змяненні законаў па пытаннях рэгулявання зямельных адносін”, які 1 чэрвеня падпісаў Аляксандр Лукашэнка, вынікае з паведамлення яго прэс-службы.

Адзначаецца, што дакумент уносіць у Кодэкс аб зямлі “комплексныя змены”, скіраваныя на “ўдасканаленне зямельных адносін і ўзмацненне адказнасці мясцовых органаў улады за развіццё рэгіёнаў”.

Сярод іншага абласныя выканкамы — для замацавання кадраў на месцах — атрымалі права “вызначаць катэгорыі асоб, якім зямельныя ўчасткі могуць надавацца без аўкцыёну”.

“Законам прадугледжваецца магчымасць паўторнага надання зямельных участкаў грамадзянам, якія маюць патрэбу ў паляпшэнні жыллёвых умоў, добраахвотна адмовіліся ад раней нададзеных — у сілу ўважлівых прычын, а таксама пазачарговага атрымання ўчасткаў сем’ямі, якія выхоўваюць дзяцей-інвалідаў, — гаворыцца ў паведамленні. — Акрамя таго, гэтым прававым актам замацоўваецца неабходнасць атрымання згоды выканкама на адчужэнне незавершаных закансерваваных капітальных пабудоў у выпадку іх размяшчэння на зямельных участках, якія знаходзяцца ў прыватнай уласнасці або арэндзе, а таксама пры наяўнасці іншых відаў правоў на іх”.

“Удакладняецца парадак выкупу зямельнага ўчастка або ўнясення платы за права яго арэнды ў выпадку здзяйснення некалькіх юрыдычна значных дзеянняў з ім (раздзел, змяненне мэтавага прызначэння, адчужэнне). Паўторнае ўнясенне платы ў перыяд дзеяння заключэння аб ацэнцы рынкавага кошту зямельнага ўчастка не спатрэбіцца”, — паведаміла прэс-служба Лукашэнкі.

Заяўлена, што дакумент удакладніў “пытанні легалізацыі самавольна занятых зямельных участкаў і самавольнага будаўніцтва” і падоўжыў магчымасць набыцця (з паніжальнымі каэфіцыентамі) або арэнду ўчасткаў, якія знаходзяцца ў землекарыстальнікаў на 1 верасня 2022 года. “Яна уніфікаваная з тэрмінам заканчэння дзеяння зямельнай амністыі — да 1 студзеня 2028 года”, — гаворыцца ў паведамленні.