Беларусь наведвае міністр абароны М’янмы
Міністр абароны М'янмы Тун Аунг
25 траўня, Позірк. Пра візіт у Беларусь міністра абароны Рэспублікі Саюз М’янма Туна Аунга паведаміла 25 траўня прэс-служба беларускага ваеннага ведамства.
Запланаваная сустрэча госця з яго беларускім калегам Віктарам Хрэніным. Праграмай візіту запланаванае наведванне Ваеннай акадэміі, вайсковых часцей і шэрагу “прадпрыемстваў рознай накіраванасці”.
3 красавіка Лукашэнка “ад імя суайчыннікаў і сябе асабіста” павіншаваў Мін Аун Хлайна з “абраннем на пасаду прэзідэнта” краіны.
У той дзень парламент М’янмы абраў ім лідара хунты, які ўзначаліў вайсковы пераварот у 2021 годзе. У выніку перавароту быў зрынуты дэмакратычна абраны ўрад дзярждарадцы Аун Сан Су Чжы (лаўрэатка Нобелеўскай прэміі міру); яна і прэзідэнт Він М’ін былі арыштаваныя.
Пераварот выклікаў масавыя пратэсты, якія перараслі ў грамадзянскую вайну. Паводле ацэнак арганізацыі ACLED (Аrmed Conflict Location & Event Data), падчас поўнамаштабнай грамадзянскай вайны агульная колькасць загінулых магла перавысіць 90 тыс. чалавек на пачатак 2026 года.
Вынікі выбараў у М’янме не прызнаюцца апазіцыяй і дэмакратычнымі краінамі.
