П’яны дальнабойшчык затрыманы ў Бабруйску

17 траўня, Позірк. Аб затрыманні ў Бабруйску кіроўцы вялікагрузнага аўтамабіля паведамляе УУС Магілёўскага аблвыканкама.

“Падчас нясення службы супрацоўнікі ДАІ спынілі грузавік Daf. Пры праверцы дакументаў фізічны стан 55-гадовага мясцовага жыхара выклікаў падазрэнне”, — гаворыцца ў паведамленні.

Адзначаецца, што медыцынскі агляд кіроўцы “паказаў наяўнасць этылавага спірту ў выдыханым паветры ў канцэнтрацыі 0,92 праміле”.

“Цяпер яму давядзецца заплаціць штраф у памеры 200 базавых велічынь (9.000 рублёў) з пазбаўленнем права кіравання транспартнымі сродкамі тэрмінам на 5 гадоў. Машына была дастаўленая на ахоўную стаянку”, — паведамляе УУС.

Дзяржаўтаінспекцыя вобласці заклікала кіроўцаў да “абавязковага выканання патрабаванняў ПДР”: “Памятайце: сядаючы за руль у стане алкагольнага ап’янення, вы падвяргаеце небяспецы іншых удзельнікаў дарожнага руху”.