6 траўня, Позірк. Пра выпадкі непропуску ў Літву пасажырскіх рэйсавых аўтобусаў, якія накіроўваліся з Беларусі пасля набыцця моцы абмежаванняў на ўвоз у краіну паліва з Беларусі і Расіі ў баках транспартных сродкаў, паведаміў беларускі навінавы транспартна-лагістычны партал Infotrans Media Belarus.
5 траўня са спасылкай на профільныя тэлеграм-каналы па праходжанні мяжы партал паведаміў, што “аўтобус кампаніі Ecolines адправілі на рэнтген, пасля якога ён больш не вярнуўся“, “пасажыраў адправілі пешшу пераходзіць мяжу і далей на таксі да Вільнюса“.
6 траўня той жа партал паведаміў, што не быў прапушчаны ў Літву пасля праверкі аўтобус кампаніі “Мінсктранс“, які адправіўся з беларускай сталіцы 5 траўня а 22:00. Адзначаецца, што пасажыры прабылі на мяжы прыкладна 3,5 гадзіны. Пазней за дадатковую плату іх пагадзіўся давезці да Вільнюса кіроўца іншага аўтобуса.
23 красавіка Сейм Літвы падоўжыў да 31 снежня 2027 года нацыянальныя санкцыі ў дачыненні да грамадзян Беларусі і Расіі.
Зацверджаныя папраўкі ў закон аб нацыянальных санкцыях прадугледжваюць “дадатковае ўвядзенне забароны на ўвоз паліва з Расіі і Беларусі ў Літву ў стандартных паліўных баках транспартных сродкаў умяшчальнасцю больш за 200 літраў”. На думку заканадаўцаў, гэта “дазволіць прадухіліць патэнцыйныя парушэнні санкцый ЕС і ўскосную падтрымку расійскага і ьеларускага рэжымаў шляхам перапампоўкі і продажу паліва ў Літве са стандартных паліўных бакаў грузавых аўтамабіляў, зарэгістраваных у трэціх краінах і якія прыбываюць з Расіі і Беларусі”.
“Пасля ўвядзення гэтай забароны, калі ў паліўным баку транспартнага сродку апынецца большая колькасць паліва, можна будзе ўжываць адказнасць, прадугледжаную Крымінальным кодэксам, Кодэксам аб адміністрацыйных правапарушэннях або законам аб міжнародных санкцыях за парушэнні міжнародных санкцый“, — падкрэслівалася ў рэлізе Сейма.
28 красавіка літоўская мытня папярэдзіла, што з 3 траўня “будзе ажыццяўляцца кантроль паліва, якое ўвозіцца з Расійскай Федэрацыі або Рэспублікі Беларусь у паліўных баках транспартных сродкаў, з забеспячэннем таго, каб яго колькасць не перавышала 200 літраў“.
Адзначаецца, што “пры выяўленні колькасці паліва, якая перавышае 200 літраў, і фіксацыі гэтага ў акце праверкі, такі транспартны сродак не будзе дапушчаны на мытную тэрыторыю Літвы/ЕС і будзе разгорнуты для вяртання ў краіну адпраўлення. У дачыненні да асоб, не згодных з такім рашэннем, могуць быць ужытыя санкцыі, прадугледжаныя арт. 515 Кодэкса аб адміністрацыйных правапарушэннях, уключаючы таксама затрыманне транспартнага сродку“.
