Беларусь гатовая развіваць супрацу з Ізраілем “па меры нармалізацыі сітуацыі” на Блізкім Усходзе

22 красавіка, Позірк. Беларусы “добра ведаюць, што такое вайна”, таму “паслядоўна выступаюць за мірнае ўрэгуляванне канфліктаў”, адзначыў Аляксандр Лукашэнка, віншуючы прэзідэнта Ізраіля Іцхака Герцага з Днём Незалежнасці (паводле яўрэйскага календару — 5 іяра; у 2026 годзе — з вечара 21 красавіка да вечара 22 красавіка).

“Падзеі на Блізкім Усходзе выклікаюць занепакоенасць і боль у нашых сэрцах, але мы спадзяемся на больш хуткі надыход спакою ў рэгіёне, — прыводзіць тэкст паслання прэс-служба віншавальніка. — Па меры нармалізацыі сітуацыі Мінск гатовы пашыраць кантакты і ўзаемадзеянне ў сферах адукацыі, медыцыны, тэхналогій, сельскай гаспадаркі і турызму”.

Паводле слоў Лукашэнкі, яўрэйскі народ “мае шматвяковыя традыцыі, у тым ліку рэлігійныя і адукацыйныя, якія і сёння фармуюць асновы ідэнтычнасці сучаснага ізраільскага грамадства”.

“Менавіта на беларускай зямлі дзейнічалі вядомыя духоўныя цэнтры — ешывы, — гаворыцца ў віншаванні. — Выхадцы з нашага краю стаялі ля вытокаў Дзяржавы Ізраіль. Усё гэта збліжае абодва народы, якія прайшлі праз агульныя цяжкія выпрабаванні Другой сусветнай вайны і трагедыю халакоста”.

Лукашэнка мяркуе, што “агульная гістарычная спадчына і шчыльныя чалавечыя сувязі будуць і надалей служыць асновай канструктыўнага дыялогу паміж Беларуссю і Ізраілем”.

28 лютага Ізраіль і ЗША пасля правалу перамоваў па ядзернай праграме Тэгерана пачалі ваенныя аперацыі супраць рэжыму аятолаў у Іране. У выніку быў забіты вярхоўны лідар Ірана Алі Хаменеі, а таксама іншыя прадстаўнікі палітычнага і вайсковага кіраўніцтва Ірана.

Тэгеран наносіў удары ў адказ. Іранскія атакі зазнаў не толькі Ізраіль, але і іншыя краіны Блізкага Усходу.

У выніку адной з іранскіх ракетных атак у Ізраілі загінуў ураджэнец Беларусі, які пражываў там, агулам прамымі і ўскоснымі ахвярамі такіх дзеянняў стала 29 чалавек, таксама ў выніку абстрэлаў загінулі чатыры жыхары Палестынскай аўтаноміі.

8 красавіка быў усталяваны рэжым спынення агню (першапачаткова да 22 красавіка, пасля падоўжаны на перыяд перагаворнага працэсу).

Колькасць ахвяр у Іране дакладна невядомая. Іранскі Чырвоны Паўмесяц паведамляў пра гібель каля 2.000 чалавек і раненні звыш 20.000. Ізраільскія крыніцы заяўляюць пра 7.000 загінулых толькі ў шэрагах сілавых структур Ірана.

Армія ЗША паведаміла пра 13 загінулых амерыканскіх вайскоўцаў у выніку атак з Ірана і крушэння самалёта KC-135 у Іраку.