Журналіст RT заявіў пра высокую падтрымку Лукашэнкі ў Беларусі — даныя не пацвярджаюцца згаданай ім крыніцай
18 красавіка, Позірк. Амерыканска-кубінскі журналіст Рык Санчэс, беручы 17 красавіка інтэрв’ю ў Аляксандра Лукашэнкі для падкантрольнага РФ міжнароднага тэлеканала RT, прывёў суразмоўцу сумнеўныя даныя пра узровень яго падтрымкі ў Беларусі.
“Я чытаў, што вы карыстаецеся падтрымкай 78% насельніцтва Рэспублікі Беларусь, — сказала інтэрв’юер, не ўдакладніўшы крыніцу (неафіцыйны тэлеграм-канал прэс-службы палітыка апублікаваў відэафрагмент з закадравым перакладам на рускую мову, які практычна цалкам перакрывае арыгінальную прамову). — Але гэтае апытанне было праведзенае ў Рэспубліцы Беларусь, таму, натуральна, я вырашыў пераправерыць. Я звярнуўся да лічбаў аднаго аўтарытэтнага агенцтва ў Лондане (чуваць, што ў арыгінале Санчэс кажа пра Chatham House. — “Позірк”.). Лондан, які не любіць Беларусь, у іх няма ніякіх прычын даваць добрую інфармацыю. Дык вось яны высветлілі, што… то бок, паводле іх падлікаў, падтрымка складае 70%. То бок лічбы — тое на тое, практычна роўныя”.
Далей, калі верыць перакладу, журналіст RT выказаў здагадку, што “некаторыя заходнія лідары”, напрыклад, прэзідэнт ЗША Дональд Трамп, прэзідэнт Францыі Эманюэль Макрон і прэм’ер-міністр Вялікабрытаніі Кір Стармер, “разам узятыя, магчыма, не маюць такой падтрымкі свайго насельніцтва, толькі мараць, каб іх так падтрымлівалі”. Ён выказаў меркаванне, што тыя з зайздрасці называюць Лукашэнку дыктатарам (хоць, напрыклад, Трамп ніколі так не казаў і называў беларускага кіраўніка “глыбокапаважаным прэзідэнтам”).
“Калі вы дыктатар, чаму 70% людзей у гэтай краіне вас падтрымліваюць?” — спытаў Санчэс (гэтая фраза прагучала ў арыгінале, без перакладу).
Лукашэнка адказаў, што яму “цяжка тут ацэньваць такую заяву, але, відаць, збольшага гэта і так”: “Сярод палітыкаў пэўная зайздрасць адзін да аднаго мы маем, гэта сапраўды так”.
“Вы абсалютна маеце рацыю (я таксама пра гэта часта думаю), дай бог, каб у нейкага заходняга палітыка было не 78%, не 80%, а хаця б 60% [падтрымкі], — сказаў ён. — У вас на Захадзе (і ў гэтым ваша бяда — і Макрона, прэзідэнта Францыі, і [канцлера ФРГ Фрыдрыха], Мерца, і гэтак далей) яны дачаснікі. <…> Прыйшлі, схапілі і сышлі. Вось аснова іх палітыкі. Таму яны не думаюць пра народ Францыі, Германіі і гэтак далей. І ў гэтым іх праблема”.
“Яны нас некалі вучылі — Расію, нас, Казахстан, Украіну, іншыя краіны, — а цяпер яны да нас маюць прыязджаць вучыцца і рабіць адпаведныя высновы. Вучыцца і рабіць высновы яны не хочуць, гэтак як у вашага Трампа. Ну хто ён такі? Ён дачаснік. У яго чатыры гады. Што ён за чатыры гады зробіць? Нічога, нічога не зробіць. Таму прэзідэнт павінен мець час”, — дадаў Лукашэнка.
У адкрытым доступе няма пацвярджэнняў таму, што якое-небудзь даследаванне брытанскага Каралеўскага інстытута міжнародных стасункаў (Chatham House) хоць некалі паказвала 70-працэнтную падтрымку Лукашэнкі ў Беларусі.
Праект Chatham House “Беларуская ініцыятыва” пасля выбараў 2020 года прадставіў вынікі даследавання “Што беларусы думаюць пра крызіс у іх краіне” (899 апытаных жыхароў гарадоў), паводле якіх за Лукашэнку тады аддало голас 20,6% рэспандэнтаў, а да “апірышча” яго прыхільнікаў было аднесена 23,1% выбаркі.
З 9 снежня 2024 года па 15 студзеня 2025-га — перад апошнім электаральным мерапрыемствам — Chatham House правёў даследаванне грамадскай думкі “Успрыманне выбарчай кампаніі і сітуацыі ў Беларусі” (833 гарадскія жыхары паўдзельнічалі ў анлайн-апытанні, 400 чалавек па выпадковай выбарцы — шляхам тэлефоннага апытання, дадаткова праведзена 15 інтэрв’ю).
Паводле яго вынікаў у беларускім грамадстве было выдзелена чатыры сегменты: праўрадавы (адназначна падтрымліваюць Лукашэнку) — 33%, эканамічна незадаволены (у цэлым лаяльныя рэжыму, але не ўхваляюць сацыяльна-эканамічную сітуацыю) — 13%, нейтральны (апалітычныя, але асобныя схільныя падтрымліваць Лукашэнку) — 41%, прадэмакратычны (праціўнікі Лукашэнкі) — 14%.
