У Мінскай вобласці затрыманыя наркакур’еры з “краін далёкага замежжа”

24 сакавіка, Позірк. Двух грамадзян “краін далёкага замежжа” (21 і 22 гады) затрымалі супрацоўнікі наркакантролю Мінскай вобласці, паведаміла 24 сакавіка прэс-служба Міністэрства ўнутраных спраў.

Заяўлена, што замежнікі — студэнты мінскай ВНУ набывалі ў інтэрнэце аптовыя партыі наркотыкаў, дзялілі на дробныя дозы і збывалі праз закладкі на тэрыторыі сталіцы і вобласці. Перамяшчаліся на арандаваным аўтамабілі. Агулам пры іх, па месцы жыхарства, а таксама ў схованках было знойдзена і вынята больш за 850 г асабліва “небяспечных псіхатропных рэчываў мефедрон і “Альфа-PVP”.

Паводле аналагічнай схемы, як паведамляецца, “працавалі і двое выхадцаў адной з рэспублік Цэнтральнай Азіі” (19 і 20 гадоў), якія пражываюць у Мінску. У іх знойдзена і вынята 500 г мефедрона. Абодва затрыманыя.

Распачатыя крымінальныя справы за незаконны абарот наркотыкаў з мэтай збыту. Фігурантам пагражае да 15 гадоў пазбаўлення волі.

У лістападзе 2024 года аб’яднанне BelPol, спасылаючыся на аналітычную даведку МУС, якая трапіла ў яе распараджэнне, адзначала, што галоўным пастаўшчыком наркотыкаў і псіхатропаў у Беларусь з’яўляецца РФ.

Як паведамляў “Позірк”, паводле даных Вярхоўнага суда, у 2025 годзе колькасць асуджаных паводле “наркатычных” артыкулаў Крымінальнага кодэкса павялічылася на 7,9% у параўнанні з 2024-м.

За здзяйсненне злачынстваў, звязаных з незаконным абаротам наркотыкаў (арт. 327–331, 332), летась было асуджана 2.253 чалавекі — 8% усіх асуджаных (у 2024-м — 2.088; 6,6%).

З іх 2.077, ці 92,2%, прызнана вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.