Лукашэнка дазволіў літоўскім фурам выязджаць — ДМК

23 сакавіка, Позірк. Аляксандр Лукашэнка “прыняў рашэнне аб магчымасці выезду грузавых транспартных сродкаў на літоўскай рэгістрацыі”, паведамляе прэс-служба Дзяржаўнага мытнага камітэта.

“Цяпер на спецыяльна абсталяваных пляцоўках размешчана больш як 1,9 тыс. транспартных сродкаў, у тым ліку цягачоў, прычэпаў і паўпрычэпаў. На працягу ўсяго перыяду забяспечвалася іх поўная захаванасць”, — гаворыцца ў рэлізе.

Паводле версіі ведамства, яны з лістапада 2025 года знаходзяцца на тэрыторыі Беларусі “з прычыны недружалюбных дзеянняў літоўскага боку па закрыцці пунктаў пропуску на беларуска-літоўскай мяжы”.

Транспартныя сродкі не змогуць пакідаць тэрыторыю Беларусі праз літоўскі напрамак “у адпаведнасці з заканадаўствам”. Літоўскія фуры, якія фактычна належаць польскім перавозчыкам, змогуць выязджаць “у тым ліку і праз польскі напрамак, дзе сумежны бок працуе больш актыўна”.

“Мытныя органы пачалі работу. Па меры паступлення ад перавозчыкаў аплаты за захоўванне, а яна цяпер у разы ніжэйшая за вызначаную раней, транспартныя сродкі змогуць выязджаць”, — заявіў ДМК.

Як паведамляецца, ведамства накіравала літоўскай мытнай службе адпаведную прапанову па павелічэнні пропуску грузавікоў.

Аб “значным зніжэнні” тарыфаў за стаянку фур з літоўскай рэгістрацыяй паведаміла прэс-служба ўрада.

“Ён у разы меншы за той, які быў устаноўлены першапачаткова, — мінімальны, зыходзячы толькі з тых затрат, якія панёс уладальнік стаянак, забяспечваючы захаванасць транспартных сродкаў”, — заявіў старшыня ДМК Уладзімір Арлоўскі.

“Пасля аплаты кожным перавозчыкам за захоўванне свайго транспартнага сродку такі грузавік зможа пакінуць пляцоўку, — гаворыцца ў рэлізе. — Напрыклад, за захоўванне прычэпа або паўпрычэпа кошт захоўвання больш як у сем разоў адрозніваецца ў меншы бок ад раней устаноўленага тарыфу. Калі поўная счэпка — меншая ў тры разы”.

Пачатак вяртання фур 23 сакавіка Аляксандр Лукашэнка анансаваў трыма днямі раней.

“Я даручыў ураду: “Давайце вы сустрэнецеся і па-чалавечы з імі пагаворыце”, — заявіў ён дзяржСМІ. — Селі за стол перамоваў, выслухалі іх і перадалі мне. Я прыму рашэнне, і, думаю, з панядзелка мы працэс вяртання гэтых фур пачнем. Вернем мы гэтыя фуры. Шкада палякаў, літоўцаў”.

Раніцай 23 сакавіка прэзідэнт літоўскай Нацыянальнай асацыяцыі аўтаперавозчыкаў LINAVA Эрландас Мікенас сказаў радыё LRT, што пацверджання вяртання фур не было: “Афіцыйнага дакумента ў нас няма, хоць мы яго вельмі чакаем і спадзяемся, што сёння ён з’явіцца. Аднак публічна дадзенае абяцанне павінна быць выканана”.

Паводле яго слоў, аплата можа дасягаць 14,4 тыс. еўра за адзін цягач: “Мы стаялі чатыры месяцы — гэта каля 120 дзён. <…> На пачатковым этапе плата складала 120 еўра ў суткі”.

17 сакавіка прадстаўнікі ўрада Беларусі на чале з прэм’ер-міністрам Аляксандрам Турчыным сустрэліся з прадстаўнікамі літоўскіх і польскіх аўтаперавозчыкаў, чые фуры ўтрымліваюцца на беларускай тэрыторыі.

Па выніках сустрэчы намеснік міністра замежных спраў Ігар Сякрэта адзначыў, што Мінск прыме рашэнне па фурах з літоўскай рэгістрацыяй і “паведаміць партнёраў з Літвы і Польшчы”. Пры гэтым ён папракнуў Вільню ў нежаданні кантактаў на палітычным узроўні.

Дзеянні беларускіх уладаў, з-за якіх у краіне затрымалася тэхніка літоўскіх і іншых перавозчыкаў з краін Еўразвяза, з’яўляюцца непрымальнымі і неабгрунтаванымі, паведамляла LRT 18 сакавіка, спасылаючыся на адказ Еўрапейскай камісіі, які атрымала LINAVA.

2 сакавіка кампанія накіравала туды афіцыйны зварот па сітуацыі.

У канцы кастрычніка 2025 года Вільнюс закрыў пункты пропуску Мядзінінкай (з беларускага боку Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Пагранпераходы аднавілі працу 20 лістапада. За тры тыдні, пакуль яны былі зачыненыя, рэжым Лукашэнкі паспеў узмацніць жорсткасць правілаў знаходжання ў краіне літоўскага грузавога транспарту, увязаўшы іх з працай пунктаў пропуску. Паведамлялася, што ў Беларусі затрымалася каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.