За тыдзень па бязвізу ў Беларусь уехала крыху больш за 4 тыс. жыхароў еўрапейскіх краін

23 сакавіка, Позірк. З 16 па 23 сакавіка ў бязвізавым парадку ў Беларусь уехала 4.012 жыхароў еўрапейскіх дзяржаў (тыднем раней — 3.969), сведчыць праведзены “Позіркам” аналіз даных Дзяржаўнага пагранічнага камітэта.

За апошні тыдзень у Беларусь прыбылі 1.567 грамадзян Літвы (1.614), 1.078 грамадзян і неграмадзян Латвіі (1.127), 794 грамадзяніны Польшчы (754), 573 грамадзяніны іншых еўрапейскіх дзяржаў са спісу пашыранага бязвізу (474).

З сярэдзіны вясны 2022 года Беларусь наведала 1.291.261 жыхар Еўропы. З Латвіі прыбыў 414.231 замежнік, з Літвы — 674.426, з Польшчы — 139.639. У рамках пашыранага бязвізу для 35 еўрапейскіх дзяржаў з 19 ліпеня 2024 года ў Беларусь уехалі 62.965 чалавек.

Для жыхароў Літвы і Латвіі бязвізавы рэжым дзейнічае з 15 красавіка 2022 года, Польшчы — з 1 ліпеня таго ж года, яшчэ 35 краін Еўропы — з 19 ліпеня 2024-га.

9 снежня 2025 года Аляксандр Лукашэнка працягнуў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нідэрландаў, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін улады лічаць “недружалюбнымі” за тое, што яны ўвялі санкцыі або далучыліся да іх.