Наўседа “спрабаваў пераканаць” Коўла быць больш асцярожным з Лукашэнкам

19 сакавіка, Позірк. Прэзідэнт Літвы Гітанас Наўседа “спрабаваў пераканаць” спецыяльнага прадстаўніка прэзідэнта ЗША па Беларусі Джона Коўла, што “трэба быць вельмі асцярожнымі, размаўляючы з беларускім дыктатарам”. Такую заяву Наўседа зрабіў 19 сакавіка перад самітам ЕС у Брусэлі.

Кіраўнік дзяржавы паведаміў, што напярэдадні сустракаўся з Коўлам у Вільнюсе. Афіцыйнай інфармацыі пра сустрэчу ад яго адміністрацыі і прэс-службы няма.

“Так, магчыма, [Аляксандр Лукашэнка] можа стварыць даволі спрыяльны фон для ўзнікнення ілюзій або спробаў уявіць, што ён можа наблізіцца да Захаду, але існуе вельмі шмат аб’ектыўных прычын, па якіх ён не можа [гэтага зрабіць]“, — цытуе прэзідэнта Літвы LRT.

Пры гэтым ён адзначыў, што на сустрэчы з Коўлам пытанне санкцый супраць Мінска не абмяркоўвалася.

Гаворачы пра Беларусь, больш увагі варта надаваць рэальным дзеянням Лукашэнкі, а не яго словам, лічыць Наўседа.

“Гэтыя рэальныя дзеянні паказваюць, што ён ні на ёту не набліжаецца да Захаду — размяшчаючы [расейскі ракетны комплекс] “Орешник“, дапамагаючы Расіі ажыццяўляць атакі дронамі супраць Украіны, проста сваёй агрэсіўнай рыторыкай, сваімі шарамі [з кантрабанднай тытунёвай прадукцыяй] і іншымі рэчамі. Няма ніякіх прычын думаць, што нешта мяняецца па сутнасці“, — заявіў прэзідэнт.

Паводле яго слоў, намаганні ЗША па вызваленні беларускіх палітвязняў “заслугоўваюць адабрэння“, аднак Лукашэнка “выкарыстоўвае і гэтую сферу ў сваіх мэтах“: “Бачачы, што яму выгадна гандляваць вызваленнем палітычных зняволеных і разлічваць на выгаду ў іншых галінах, ён, наадварот, атрымлівае матыў саджаць у турмы яшчэ больш людзей, каб у будучыні мець гэты рычаг для атрымання яшчэ большай выгады. Гэта, я б сказаў, замкнёнае і вельмі заганнае кола”.

Раней паведамлялася, што Коўл 18 сакавіка сустрэўся ў Вільнюсе таксама з прэм’ер-міністрам Літвы Інгай Ругінене.

Асобна ён неафіцыйна сустрэўся з дэпутатамі Сейма Ігнасам Вегеле і Рымасам Ёнасам Янкунасам, а таксама дэпутатам Еўрапарламента ад Літвы Пятрасам Гражулісам, вынікае з публікацыі LRT.

Коўла ў Мінску 19 сакавіка прыняў Лукашэнку. Сярод іншага прадстаўнік прэзідэнта ЗША заявіў, што Вашынгтон зацікаўлены ў паляпшэнні стасункаў паміж Мінскам і Вільнюсам.