У жыхара Літвы памежнікі знайшлі 2 тыс. пачкаў беларускіх цыгарэт
17 сакавіка, Позірк. У домаўладанні жыхара Шальчынінкайскага раёна Літвы памежнікі выявілі амаль 2 тыс. пачкаў беларускіх цыгарэт, паведамляе прэс-служба Службы аховы дзяржаўнай мяжы (САДМ).
Як адзначаецца, у ноч на 15 сакавіка на тэрыторыі каля мяжы з Беларуссю было зафіксавана перамяшчэнне беспілотнага лятальнага апарата з грузам.
“Памежнікі неадкладна ўжылі прыладу супраць беспілотнікаў, у выніку чаго ён упаў”, — гаворыцца ў рэлізе.
У раёне месца падзення дрона памежнікі заўважылі мужчыну, які падабраў груз і пабег у бок размешчанага непадалёк дома.
Фігурант быў затрыманы, у яго домаўладанні знойдзены згаданыя цыгарэты, большая частка — у калодзежы.
Праводзіцца дасудовае расследаванне. Мужчыну, які знаходзіцца пад падпіскай аб нявыездзе, пагражае да чатырох гадоў пазбаўлення волі.
Ад 1 студзеня да 12 сакавіка 2026 года літоўскія памежнікі перахапілі 57 партый нелегальных цыгарэт, дастаўленых з Беларусі з дапамогай паветраных шароў, паведамляла САДМ.
Паводле інфармацыі ведамства, у студзені мінулага года было перахоплена 63 партыі (у тым жа месяцы 2026-га — 29), у лютым — 45 (24), за ўвесь сакавік — 77 (за 12 дзён — 4).
Пра зніжэнне інтэнсіўнасці паветранай кантрабанды цыгарэт з Беларусі САДМ заяўляла 13 лютага.
У 2025 годзе літоўскія памежнікі затрымалі 171 чалавека, меркавана звязанага з згаданым спосабам нелегальнай дастаўкі цыгарэт.
Раней паведамлялася, што ў мінулым годзе было перахоплена агулам 635 партый цыгарэт, дастаўленых паветранымі шарамі з Беларусі ў Літву. У 2024 годзе такіх выпадкаў было 226. У 2022 годзе выпадкаў кантрабанды паветранымі шарамі не было, а ў 2023-м было зафіксавана тры падобныя спробы.
Прадстаўнік МЗС абвінаваціў Вільнюс у нежаданні палітычных кантактаў
17 сакавіка, Позірк. З абвінавачаннем у бок афіцыйнага Вільнюса ў тым, што той разглядае любыя кантакты з Мінскам на палітычным узроўні "як сваю ўласную паразу", выступіў намеснік міністра замежных спраў Ігар Сакрэта 17 сакавіка па выніках сустрэчы прадстаўнікоў урада з …
