Лукашэнка: У рэстаранах у сваім жыцці я быў, можа, тры разы — у звычайных рэстаранах, савецкіх
8 сакавіка, Позірк. “У рэстаране ў сваім жыцці я быў, можа, тры разы. У звычайных рэстаранах, савецкіх”, — заявіў Аляксандр Лукашэнка 8 сакавіка ў Мінску, наведваючы аб’ект сеткі хуткага харчавання Mak.by у Першым Нацыянальным гандлёвым доме.
“Майце на ўвазе, што я Mak.by першы раз”, — цытуе Лукашэнку прэс-служба.
Паводле яго слоў, пасля сыходу з Беларусі сеткі “Макдональдс” ён даручыў зрабіць так, каб “айчынны аналаг быў не горшы за амерыканскую сетку хуткага абслугоўвання”.
“А цяпер хай амерыканцы прыйдуць і паглядзяць. Прыедуць да мяне — абавязкова прывядзі іх сюды, — звярнуўся Лукашэнка да першага віцэ-прэм’ера Мікалая Снапкова. — Скажы: пойдзем у “Макдональдс”. Беларусы працуюць, беларускае абсталяванне, беларускі прадукт”.
Паведамляецца, што візіцёр прапанаваў пашырыць сетку Mak.by “у тым ліку і ў раённых цэнтрах”.
“Трэба больш зрабіць. Калі трэба нейкая капейка — з вяртаннем, ненадоўга. Мы дапаможам з бюджэту, але не на вялікі прамежак часу. Калі ёсць попыт на гэта, трэба і ў раённых цэнтрах адкрываць”, — удакладніў ён.
“Беларускі лідар таксама выказаўся аб высокай якасці айчынных прадуктаў харчавання. Не ў апошнюю чаргу гэтага атрымалася дамагчыся за кошт рашэння аб захаванні савецкіх ГОСТ у Беларусі”, — гаворыцца ў паведамленні прэс-службы Лукашэнкі.
У лістападзе 2022 года беларускае прадстаўніцтва сеткі рэстаранаў “Макдональдс” паведаміла аб хуткім сыходзе з беларускага рынку, а затым — пра тое, што на працягу некалькіх тыдняў рэстараны пачнуць працаваць пад расійскім брэндам “Смачна — і кропка”.
Пасля рэстараны былі перайменаваныя ў Mak.by і працуюць пад гэтай назвай.
18 лістапада 2022 года Лукашэнка заклікаў “не ахаць і не охаць” з нагоды сыходу “Макдональдса” з Беларусі.
“Я яшчэ раз вас заклікаю: харчуйцеся, спажывайце сваё, не кідайцеся на заморскае, — сказаў ён. — Гэта сёння актуальна гучыць, бо некаторыя, асабліва сярод моладзі, ды і, напэўна, сярэдняга ўзросту, а можа, і старэйшага, сталі ахаць і охаць: “Ах, “Макдональдс” сыходзіць”. Я думаю: дзякуй богу, што сыходзіць”.
Пры гэтым Лукашэнка падкрэсліў, што месца “Макдональдса” “павінны заняць беларусы, ніхто іншы”.
12 снежня падчас разгляду кадравых пытанняў ён назваў “Макдональдс” сярод нацыяналізаваных прадпрыемстваў.
18 студзеня гэтага года Лукашэнка заявіў, што ў Беларусі “цудоўна разабраліся” з наступствамі сыходу “Макдональдса”: людзі з задавальненнем ходзяць у гэтыя рэстараны, падкрэсліў ён.
У снежні мінулага года ў Міністэрстве антыманапольнага рэгулявання і гандлю (МАРГ) назвалі Mak.by, “буйной беларускай сеткай” з нацыянальнай кухняй.
Лукашэнка запатрабаваў ад сеткі Маk.by цалкам перайсці на беларускую бульбу
28 жніўня, Позірк. Поўнага пераходу на беларускую бульбу запатрабаваў Аляксандр Лукашэнка ад сеткі Mak.by падчас рабочай паездкі ў Кіраўскі раён (Магілёўская вобласць). "Каб у Mak.by з 1 кастрычніка не было ніводнага кавалка імпартнай бульбы. І катлеты. Там павінна быць беларускае. …
