У Польшчы затрыманы беларус з наркотыкамі

6 сакавіка, Позірк. У г. Ліпска (Мазавецкае ваяводства Польшчы) арыштаваны 46-гадовы грамадзянін Беларусі, у якога былі знойдзены наркотыкі, паведамляе гарадская паліцыя.

Адзначаецца, што затрыманне адбылося падчас праверкі законнасці знаходжання грамадзяніна Беларусі ў Польшчы.

3 сакавіка мужчыну прад’явілі абвінавачанне ў захоўванні наркотыкаў, і ён прызнаў сваю віну. Яму пагражае да трох гадоў пазбаўлення волі, адзначаецца ў рэлізе.

Пры гэтым у падраздзяленне Памежнай аховы накіраваны зварот з просьбай пачаць адміністрацыйны разгляд для вынясення рашэння аб абавязковым вяртанні беларуса на радзіму.

23 лютага стала вядома пра затрыманне беларуса — кіроўцы грузавога аўтамабіля, у якім была выяўлена буйная партыя наркотыкаў. Прэс-служба Надбужанскага атрада Памежнай аховы Польшчы паведаміла, што ў прычэпе было знойдзена 275 пакетаў, у якіх знаходзілася больш за 111 кг гашышу. Паводле звестак памежнай службы, кошт канфіскаваных наркотыкаў на чорным рынку — амаль 5,7 млн злотых (каля 1,6 млн долараў па курсе Нацыянальнага банка Польшчы).

2 лютага паведамлялася, што ў Польшчы за гандаль наркотыкамі ў складзе злачыннай групы затрыманыя двое грамадзян Беларусі, агулам па справе затрымана 12 чалавек, іх абвінавачваюць ва ўдзеле ў арганізаванай злачыннай групе, гандлі наркотыкамі і адмыванні грошай. Справа перададзена ў суд 30 студзеня.