Рыжанкоў абмеркаваў з амбасадарам Кітая маючыя адбыцца “кантакты кіраўніцтва дзвюх краін”

27 лютага, Позірк. Пра сустрэчу 27 лютага міністра замежных спраў Максіма Рыжанкова з амбасадарам Кітая ў Беларусі Чжан Вэньчуанем паведаміла замежнапалітычнае ведамства.

Адзначаецца, што на сустрэчы “адбыўся абмен думкамі па актуальных пытаннях двухбаковага і міжнароднага парадку дня, абмеркаваны графік маючых адбыцца ў 2026 годзе кантактаў кіраўніцтва дзвюх краін”.

“Асаблівая ўвага нададзена разгляду пытанняў узаемадзеяння па лініі міжнародных арганізацый у рэалізацыі ініцыятыў, накіраваных на ўмацаванне стабільнасці, аднаўленне міру і бяспекі, а таксама на забяспячэнне неабходных умоў для супрацоўніцтва ў адпаведнасці з духам і літарай Статута ААН”, — гаворыцца ў паведамленні.

Рыжанкоў, як заяўляецца, пацвердзіў “прыхільнасць Беларусі прынцыпу “аднаго Кітая”, падтрымку намаганняў кітайскага ўрада ў пытанні абароны нацыянальнага суверэнітэту і тэрытарыяльнай цэласнасці”.

Бакі падкрэслілі гатоўнасць “няўхільнага выканання ўсіх дамоўленасцяў кіраўнікоў Беларусі і Кітая па ўмацаванні палітычнага ўзаемадзеяння, пашырэнні гандлёва-эканамічнага і інвестыцыйнага супрацоўніцтва, развіцці прамысловай і тэхналагічнай кааперацыі”.

Для Беларусі і Кітая 2026 год “стане часам удалых магчымасцяў, смелых рашэнняў і канкрэтных спраў”, упэўненасць у гэтым выказаў Аляксандр Лукашэнка, віншуючы 17 лютага старшыню КНР Сі Цзіньпіна са святам вясны (кітайскім Новым годам).

Мінулы год палітык назваў важным этапам у развіцці “двухбаковых адносін усепагоднага і ўсебаковага стратэгічнага партнёрства”.

“З цеплынёй успамінаю нашы сустрэчы ў Пекіне і Цяньцзіні, падчас якіх мы вызначылі доўгатэрміновыя арыенціры для далейшага супрацоўніцтва”, — падкрэсліў Лукашэнка.

Адметна, што 27 студзеня на нарадзе па пытаннях супрацы з КНР Лукашэнка даў зразумець, што дырэктыва аб развіцці стасункаў з Кітаем на 2021–2025 гады не выкананая.

“Патрабуецца перафарматаваць інвестыцыйны кірунак, — сказаў ён. — Кітайскія ўкладанні за мяжу ставяць рэкорды, асабліва ў краіны “Пояса і шляху”. Наш урад таксама рапартуе пра рост (летась за 9 месяцаў адносна аналагічнага перыяду 2024 года больш чым у два з паловай раза да 443 мільёнаў долараў)”.

“Але ў дырэктыву закладваліся істотна больш напружаныя паказчыкі (не менш за паўмільярда долараў, прычым штогод, і не менш за 150 мільёнаў прамых інвестыцый у кожную вобласць і горад Мінск). Калі бачыш лічбы прамых кітайскіх інвестыцый па абласцях (Віцебская — 1 мільён, Гродзенская — 100 тысяч за пяцігодку), адразу ясна, хто як працуе. Але не па Кітаю — у прынцыпе”, — дадаў палітык.

3 снежня 2021 года Лукашэнка падпісаў дырэктыву № 9 “Аб развіцці двухбаковых стасункаў Рэспублікі Беларусь з Кітайскай Народнай Рэспублікай” да 2025 года. Аналагічны дакумент дзейнічаў у 2015–2021 гадах.

Дырэктыва вызначала прыярытэтнымі задачамі ўмацаванне супрацы ў палітычнай сферы, захаванне і памнажэнне каштоўнасцей сяброўства і ўзаемнай падтрымкі, нарошчванне гандлёва-эканамічнага, фінансавага, інвестыцыйнага ўзаемадзеяння, рэалізацыю ініцыятывы “Пояс і шлях”.

Кітай ёсць буйным інвестарам у Беларусі, аднак праекты рэалізуюцца з прывязанымі крэдытамі, пры якіх вялікая доля сродкаў вяртаецца назад у Кітай праз закупкі кітайскай тэхнікі і паслуг.

Самы буйны праект — індустрыяльны парк “Вялікі камень” (Great Stone Industrial Park).

У 2025 годзе знешнегандлёвы абарот рэзідэнтаў індустрыяльнага парку “Вялікі камень” склаў 964,9 млн долараў — на 36,4% больш, чым за аналагічны перыяд 2024-га (707,5 млн), сведчыць праведзены “Позіркам” аналіз даных Нацыянальнага статыстычнага камітэта.

Экспарт склаў 414 млн долараў (324,5 млн; +27,6%), імпарт — 550,9 млн (383 млн; +43,8%), адмоўнае сальда — 136,9 млн (годам раней таксама было адмоўным — 58,5 млн; рост у 2,3 раза).

Тавараў прададзена на 181,4 млн долараў (156,8 млн; +15,7%), набыта — на 422,1 млн (309 млн; +36,6%), адмоўнае сальда — 240,7 млн ​​(-152,2 млн; рост у 1,6 раза).

Паслуг рэалізавана на 232,6 млн долараў (167,7 млн; +38,7%), набыта — на 128,8 млн (74 млн; рост у 1,7 раза), дадатнае сальда — 103,8 млн (93,7 млн; +10,8%).

Гадавая выручка вырасла на 6% (з 1 млрд 604,1 млн у 2024-м да 1 млрд 701,1 млн рублёў у 2025-м), чысты прыбытак — у 2,4 раза (з 105,8 млн да 252,6 млн).