За апошнія 30 гадоў папуляцыя высакароднага аленя павялічылася ў Беларусі ў 10 разоў — Мінлясгас
26 лютага, Позірк. За апошнія 10 гадоў колькасць асноўных відаў паляўнічых жывёл значна ўзрасла, паведаміў начальнік аддзела паляўнічай гаспадаркі Міністэрства лясной гаспадаркі Аляксандр Казарэз на прэс-канферэнцыі ў Мінску 26 лютага.
Паводле яго, гэта адбылося дзякуючы актыўнай працы карыстальнікаў паляўнічых угоддзяў і дзяржаўных органаў.
Колькасць лася павялічылася з 33 тыс. да 43 тыс. асобін (+30,3%), казулі — з 82 тыс. да 137 тыс. (+67,1%), высакароднага аленя — з 16 тыс. да 53 тыс. (у 3,2 раза).
“Калі ўзяць за 30-гадовы перыяд, то колькасць высакароднага аленя вырасла больш чым у 10 разоў. Гэта адзін з нашых асноўных паказчыкаў, якім мы ганарымся, таму што рассяленне гэтага віду праводзілася ў рамках цэлага шэрагу дзяржаўных праграм. Было тры дзяржпраграмы, у рамках якой мы праводзілі рассяленне за кошт дзяржпошліны, якую выплачваюць паляўнічыя“, — сказаў Казарэз.
За апошнія пяць гадоў расселена больш за 1.900 высакародных аленяў, 9 зуброў, 725 ланяў і 11 глушцоў, адзначыў прадстаўнік Мінлясгаса.
