Швейцарыя пашырыла санкцыі ў дачыненні да Беларусі
26 лютага, Позірк. Федэральная рада Швейцарыі 25 лютага “цалкам зацвердзіла прынятыя 23 кастрычніка 2025 года Еўрапейскім саюзам дадатковыя захады супраць Беларусі ў святле ўдзелу гэтай краіны ў вайне Расіі супраць Украіны“, гаворыцца на сайце швейцарскага ўрада.
Паводле інфармацыі кабінета, сярод іншага санкцыі ўключаюць падаўжэнне забароны на прадастаўленне паслуг, ўзмацненне жорсткасці некаторых гандлёвых абмежаванняў і меры, якія тычацца криптовалют. Новыя палажэнні набылі моц 26 лютага.
Адзначаецца, што гэтае рашэнне яшчэ больш набліжае швейцарскі рэжым санкцый супраць Беларусі да рэжыму супраць Расіі, узмацняючы яго дзеянне і прадухіляючы абыход.
Тэкст пастановы досыць аб’ёмны, ён даступны на спецыялізаванай платформе для публікацыі швейцарскага заканадаўства.
Асобна нагадваецца, што 12 снежня 2025 года Швейцарыя ўнесла ў санкцыйны спіс старшыню “Белнафтахіма“ Іллю Ікана, генеральнага дырэктара холдынгу “Гарызонт“ Юрыя Прадко, сам холдынг і асобна навукова-даследчае прадпрыемства “Інстытут лічбавага тэлебачання “Гарызонт“, а таксама ЗАТ “Галаграфічная індустрыя“, якія трапілі пад санкцыі ЕС летась у кастрычніку. Таксама краіна далучылася да прынятых тады ж санкцый ЕС у дачыненні да “Альфа-Банк (Беларусь)“, “Сбер Банк (Беларусь)“, “Банк ВТБ (Беларусь)“.
Гэта было зроблена ў рамках першага этапу імплементацыі прынятых Еўрасаюзам 23 кастрычніка мінулага года санкцый у дачыненні да Беларусі і Расіі, цяпер Швейцарыя далучылася да іх цалкам.
