ААЦ скараціў склад Савета незалежнага рэгулятара ў сферы ІКТ

26 лютага, Позірк. Савет незалежнага рэгулятара ў сферы інфармацыйна-камунікацыйных тэхналогій (ІКТ) скарочаны да дзевяці чалавек (да гэтага было 11), вынікае з загаду начальніка Аператыўна-аналітычнага цэнтра № 32 ад 23 лютага.

Згодна з дакументам, апублікаваным 26 лютага на Нацыянальным прававым інтэрнэт-партале, цяпер у Савет уваходзяць (паводле службовага прынцыпу): начальнік ААЦ і яго намеснік, кіраўнік апарата Савета міністраў, старшыня прэзідыума Нацыянальнай акадэміі навук (раней — першы намеснік кіраўніка НАН), тры міністры — сувязі і інфарматызацыі, фінансаў і юстыцыі, першы намеснік міністра эканомікі, начальнік сакратарыята наглядальнага савета Парка высокіх тэхналогій (раней — дырэктар ПВТ).

З савета выключаны старшыня Канфедэрацыі лічбавага бізнесу і першы намеснік старшыні Дзяржаўнага камітэта па навуцы і тэхналогіях.

Рэгулятар, названы незалежным, створаны ўказам Аляксандра Лукашэнкі № 515 ад 8 лістапада 2011 года.

Сярод яго паўнамоцтваў: узгадненне інвестыцыйных праектаў, законапраектаў у сферы ІКТ; садзейнічанне прыцягненню інвестыцый у сферу ІКТ і развіццю рынку паслуг электрасувязі ў частцы аказання паслуг перадачы даных і тэлефаніі па IP-пратаколе; разгляд пытанняў, звязаных з ліцэнзаваннем дзейнасці ў галіне сувязі ў частцы паслуг перадачы даных і тэлефаніі па IP-пратаколе; распрацоўка і выданне нарматыўных прававых актаў па пытаннях рэгулявання рынку паслуг перадачы дадзеных.