Урад павысіў для насельніцтва тарыфы на газ, цеплавую і электраэнергію

25 лютага, Позірк. З 1 сакавіка 2026 года ў Беларусі будуць дзейнічаць новыя тарыфы на газ, цеплавую і электраэнергію для насельніцтва.

Згодна з пастановай урада, цэны (тарыфы) распрацаваныя “зыходзячы з падыходаў, прынятых пры размеркаванні прыросту плацяжоў па тыпавой кватэры ў памеры 22,5 рубля або 0,5 базавай велічыні паміж усімі жыллёва-камунальнымі паслугамі, адзначае прэс-служба ўрада.

Цэны на газ павялічваюцца на 7,07%, тарыфы на электраэнергію — на 7%, цеплаэнергію — на 7,3%.

Балон звадкаванага газу (21 кг) падаражэе на 6,9% (1,7 рубля) і будзе каштаваць 26,2 рубля.

Раней паведамлялася, што павышэнне тарыфаў для насельніцтва ў сферы жыллёва-камунальнай гаспадаркі з ініцыятывы ўрада было перанесена Аляксандрам Лукашэнкам з 1 студзеня на 1 сакавіка.

“У выніку існуючых умоў надвор’я і ўстойліва нізкай тэмпературы вонкавага паветра ў студзені гэтага года на ацяпленне выдаткавана, паводле папярэдніх разлікаў, на 45% больш цеплавой, электрычнай энергіі і прыроднага газу, чым у снежні 2025-га. Гэта прагназуема павінна прывесці да росту плацяжоў насельніцтва за ацяпленне“, — гаварылася ў паведамленні яго прэс-службы.

Рост тарыфаў на ЖКП з пачатку года прадугледжваўся ўказам Лукашэнкі ад 23 студзеня 2026-га № 33.

У дакуменце падкрэслівалася, што плацяжы для насельніцтва (у разліку на сям’ю з трох чалавек, якія пражываюць у двухпакаёвай кватэры агульнай плошчай 48 кв.м, пры нарматыўным спажыванні паслуг) павысяцца ў 2026 годзе ў межах 0,5 базавай велічыні (22,5 рубля).

Павышэнне тарыфаў планавалася правесці ў два этапы: са студзеня — на 19,37 рубля (на ўсе паслугі, за выключэннем ацяплення і гарачага водазабеспячэння), з чэрвеня — на 3,13 рубля (на цеплавую энергію на мэты ацяплення і гарачага водазабеспячэння).

Згодна з праведзеным “Позіркам“ аналізам звестак “Белстата”, у 2025 годзе з усіх ЖКП найбольш падаражэлі паслугі абыходжання з цвёрдымі камунальнымі адкідамі (на 22,93%) і халоднае водазабеспячэнне (на 21,15%).

Гранічна дапушчальны рост тарыфаў ЖКП устанаўліваецца штогод.

Мінулы студзень стаў найхаладнейшым за апошнія 16 гадоў, вынікае са звестак Белгідрамета. Сярэдняя тэмпература склала 10,3 градуса марозу, што на 6,2 градуса ніжэй за норму (-4,1).

Найбольш халоднай у мінулым месяцы была другая дэкада— на 12 градусаў ніжэй за норму. Самая нізкая тэмпература была зафіксаваная ноччу 14 студзеня на метэастанцыі Вялікі Межнік (Шклоўскі раён) — 29,7 градуса марозу.