Ціханоўская запэўніла ўкраінцаў, што беларусы на іх баку
24 лютага, Позірк. Беларусы “на баку Украіны, а не агрэсара”, заявіла дэмакратычны лідар Святлана Ціханоўская ў звароце да ўкраінцаў 24 лютага, у чацвёртую гадавіну поўнамаштабнай вайны, якую Расія вядзе супраць іх краіны.
“Мы, як і Украіна, з’яўляемся часткай Еўропы, а не “рускага свету”. І разам мы зможам дамагчыся свабоды і міру для нашых народаў. Разам мы зможам дамагчыся справядлівасці і прыцягнуць вінаватых да адказнасці”, — выказала ўпэўненасць палітык.
Ціханоўская адзначыла, што беларусы захапляюцца адвагай украінцаў: “Тым, як вы падтрымліваеце адзін аднаго, як абараняеце сваю краіну — на фронце і ў тыле. Тым, як працуюць украінскія добраахвотнікі, як урачы ратуюць пад абстрэламі, як працаўнікі энергетыкі аднаўляюць святло пасля ўдараў. Тым, як украінцы кожны дзень імкнуцца жыць, кахаць, абараняць адзін аднаго — і захоўваць чалавечнасць у сабе”.
Паводле яе слоў, беларусы ведаюць, “што такое Расія”, яе “імперскія апетыты”, ведаюць, “што такое тыранія”. Беларускі народ разумее, што сёння Украіна “змагаецца не толькі за сябе, але і за ўсіх”, у тым ліку “за свабодную Беларусь”, падкрэсліла Ціханоўская.
“Вось чаму чатыры гады таму, а то і раней, многія беларусы добраахвотна пайшлі ваяваць за Украіну, — працягнула дэмлідар. — Многія заплацілі самым каштоўным — сваімі жыццямі. Нават сёння, у гэты дзень, многія беларусы знаходзяцца на перадавой або ў расійскім палоне — і мы молімся за іх жыццё і за перамогу Украіны”.
“Мы таксама молімся за беларускіх палітычных зняволеных: сотні з іх знаходзяцца ў турме за сваю салідарнасць з Украінай, за спробы спыніць пастаўкі расійскай тэхнікі або за распаўсюд праўды пра вайну”, — дадала палітык.
Ціханоўская адзначыла, што “пасля пачатку поўнамаштабнага ўварвання многія беларусы засталіся ва Украіне — нягледзячы на абстрэлы і праблемы з дакументамі — для аказання дапамогі”. Паводле яе слоў, беларуская супольнасць ва Украіне “займаецца валанцёрскай дзейнасцю, збірае сродкі і дапамагае ветэранам”, а беларуская дыяспара па ўсім свеце “ахвяруе грошы ўкраінскай арміі і гуманітарным праграмам”.
“Лёс Беларусі таксама залежыць ад выніку вайны. Калі Украіна будзе моцная, а Расія слабая, гэта адкрые шлях да вызвалення Беларусі. Бо сёння наша краіна знаходзіцца ў закладніках у двух дыктатараў, яе ператвараюць у расійскую вайсковую базу і зборачны цэх для расійскай арміі. Разгортваюцца ядзерная зброя і “Арэшнік”. Усё гэта робіцца супраць волі беларусаў. Але наш народ, я ўпэўнена, усё адно выкажа сваё меркаванне”, — лічыць дэмлідар.
24 лютага 2026 года Ціханоўская разам з іншымі членамі Аб’яднанага пераходнага кабінета возьме ўдзел у цырымоніі ўскладання вянкоў да помніка Тарасу Шаўчэнку ў Варшаве, прымеркаванай да чарговай гадавіны вайны.
24 лютага 2022 года Расія распачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак журналістаў-расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.
За чатыры гады ў Беларусі за падтрымку Украіны асуджана не менш за 403 чалавекі — "Вясна"
24 лютага, Позірк. З лютага 2022 года не менш за 403 чалавекі (у тым ліку 71 жанчына) у Беларусі асуджана за падтрымку Украіны, больш за 200 з іх зараз знаходзіцца ў няволі, сведчаць даныя, апублікаваныя праваабарончым цэнтрам "Вясна" ў чацвёртую …
