Жыхар Бабруйска застрэліў падчас палявання чырвонакніжную рысь, распачатая крымінальная справа
20 лютага, Позірк. 40-гадовы жыхар Бабруйска (Магілёўская вобласць) у студзені гэтага года падчас загоннага палявання застрэліў рысь, якая “знянацку з’явілася”, паведамляе Следчы камітэт.
Адзначаецца, што мужчына не меў дазволу на адстрэл рысі, у яго быў дазвол палявання на дзіка. Пры гэтым, забіўшы рысь, якая ўнесеная ў Чырвоную кнігу, ён не паведаміў пра здарэнне і “пакінуў тушу ва ўгоддзях”.
Рысь выявілі інспектары аховы жывёльнага і расліннага свету.
Паведамляецца, што супрацоўнікамі СК у паляўнічага канфіскаваныя зброя і боепрыпасы, прызначаны шэраг экспертных даследаванняў. Урон навакольнаму асяроддзю ацэньваецца на ўзроўні 13,5 тыс. рублёў.
Распачатая крымінальная справа паводле ч. 4 ст. 282 УК (незаконная паляванне, якое пацягнула прычыненне шкоды ў асабліва буйным памеры). Максімальнае пакаранне паводле гэтага артыкула — шэсць гадоў пазбаўлення волі з канфіскацыяй прылад злачынства, штрафам да 500 базавых велічынь (22.500 рублёў) і пазбаўленнем права займацца дзейнасцю, звязанай з паляваннем.
На пачатку лютага старшыня Беларускага таварыства паляўнічых і рыбаловаў (БТПР), былы міністр унутраных спраў Ігар Шуневіч заявіў, што з 57 асобін рысі, адведзеных для паляўнічага промыслу ў мінулым сезоне, было здабыта ўсяго шэсць (10,5%). Сезон Шуневіч назваў “правальным”.
Ён падкрэсліў, што “ўсе страхі прыродаахоўнікаў адносна ўплыву на папуляцыю аказаліся блефам, нагнятаннем атмасферы”. “Па факце паляванне на рысь не стала феноменам нацыянальнага палявання”, — дадаў Шуневіч.
Сезон палявання на рысь працягваўся ад 31 кастрычніка 2025 года да 31 студзеня 2026-га.
Пра тое, што ўрад дазволіў паляванне на рысь, стала вядома з пастановы Савета міністраў № 233 ад 23 красавіка 2025 года. Дакументам былі ўнесены дапаўненні ў пастанову ад 14 чэрвеня 2018 года № 454 “Аб некаторых пытаннях палявання і вядзення паляўнічага гаспадарства”.
Дазвол на здабычу рысі для грамадзян Беларусі і іншых краін Еўразійскага эканамічнага саюза каштуе 200 рублёў (тут і далей — мінімальны гранічны кошт), для прадстаўнікоў іншых дзяржаў — 500.
Ахоўны статус рысі ў Чырвонай кнізе быў паніжаны пастановай Мінпрыроды № 10 ад 14 сакавіка 2025 года.
18 сакавіка 2024 года Аляксандр Лукашэнка падпісаў указ, які карэктуе правілы палявання і вядзення паляўнічай гаспадаркі.
Дакументам дазволена паляванне на мядзведзя і рысь у “асаблівым рэжыме”, які дазваляе “кантралявана рэгуляваць іх колькасць на падставе планаў кіравання папуляцыямі, што распрацоўваюцца Нацыянальнай акадэміяй навук Беларусі”.
