Амбасадар у РФ Селіверстаў назваў Беларусь “надзейным пунктам апоры бяспекі ў Еўропе”

20 лютага, Позірк. Беларусь з’яўляецца “надзейным пунктам апоры бяспекі ў еўрапейскім рэгіёне”, заявіў амбасадар у РФ Юрый Селіверстаў 19 лютага ў Маскве падчас прыёму з нагоды Дня абаронцы Айчыны.

“Гэта — выбар беларускага народа і ўжо непахісны факт гісторыі”, — цытуе дыпламата прэс-служба амбасады.

Паводле слоў Селіверстава, знешнепалітычная дзейнасць Беларусі грунтуецца на “стратэгічных саюзніцкіх адносінах” з Расіяй, а таксама “ўсебаковым супрацоўніцтве” з іншымі дружалюбнымі дзяржавамі.

“Ваеннае супрацоўніцтва паміж Беларуссю і брацкай Расіяй з’яўляецца асноватворным элементам у базе саюзнага будаўніцтва, носіць стратэгічны характар. Мэтанакіраваная і планавая работа па стварэнні дзейснай сістэмы ваеннай бяспекі, якая праводзіцца нашымі дзяржавамі, дазваляе забяспечыць паспяховае функцыянаванне рэгіянальнай групоўкі войск”, — падкрэсліў амбасадар.

24 лютага 2022 года Расія распачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі прадаставіў войску РФ тэрыторыю для нападу на суседнюю краіну зімой і вясной 2022 года.

21 ліпеня 2022 года ў інтэрв’ю францускаму інфармацыйнаму агенцтву “Франс Прэс” Лукашэнка паведаміў, што з Беларусі ва Украіну была ўведзеная 20-тысячная групоўка расійскіх войск.

Акрамя таго, на працягу многіх месяцаў з тэрыторыі Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.

Расследавальнікі неаднаразова прадстаўлялі даныя, якія сведчаць пра тое, што многія беларускія прадпрыемствы актыўна займаюцца вытворчасцю на карысць расійскага ваенна-прамысловага комплексу.

Лукашэнка і прадстаўнікі яго рэжыму неаднаразова заяўлялі, што могуць прыняць у сябе перамоўныя дэлегацыі Украіны і РФ. Пры гэтым сваю ролю яны ацэньваюць супярэчліва, то выказваючы гатоўнасць стаць пасрэднікам, то катэгарычна ад гэтага адмаўляючыся.

На сустрэчы з прэзідэнтам Расіі 26 лістапада мінулага года ў Бішкеку (Кыргызстан) Лукашэнка пацвердзіў “гатоўнасць аднавіць мірныя перамовы па Украіне на мінскай пляцоўцы”.

Уладзімір Зяленскі 12 лютага выключыў магчымасць правядзення перамоў з Пуціным у Маскве або на тэрыторыі Беларусі.