Ціханоўская заклікала ПА АБСЕ стварыць працоўную групу і прызначыць спецдакладчыка па Беларусі
20 лютага, Позірк. Стварыць працоўную групу па Беларусі ў рамках Парламенцкай асамблеі АБСЕ і запрашаць на сесіі прадстаўнікоў дэмакратычных сіл заклікала беларускі дэмакратычны лідар Святлана Ціханоўская, выступаючы 20 лютага на пасяджэнні ПА АБСЕ ў Вене.
Палітык таксама прапанавала прызначыць спецыяльнага дакладчыка па Беларусі.
Паводле слоў Ціханоўскай, яна верыць, што 2026 год можа стаць вырашальным — не толькі для Украіны, але і для Беларусі.
“Змены ў Беларусі непазбежныя. Гісторыя паказвае, што такія дыктатуры разбураюцца тады, калі гэтага ніхто не чакае, — сказала дэмлідар. — Мы мусім ужо зараз рыхтавацца да постлукашэнкаўскай Беларусі. Я перакананая, што АБСЕ адыграе ключавую ролю ў гэтым працэсе. З вашай дапамогай нам трэба будзе аднавіць справядлівасць, адрадзіць інстытуты і вярнуць Беларусь у міжнародную супольнасць”.
Спікер заклікала працягваць ціск на рэжым у Мінску і “трымаць яго ў ізаляцыі — да тае пары, пакуль ён не пачне размаўляць са сваімі грамадзянамі, <…> не вызваліць палітвязняў, не спыніць рэпрэсіі і, у канчатковым выніку, не пакладзе канец гэтай вайне”.
“Літаральна ўчора лідар беларускіх сацыял-дэмакратаў Мікалай Статкевіч выйшаў на волю. Пасля пяці гадоў катаванняў і ізаляцыі ён нарэшце абняў сваю жонку. У турме ў яго здарыліся інсульт, ён ледзь не памёр. Цяпер яму цяжка размаўляць. Так, ён знясілены, але не зламаны. Яго гісторыя нагадвае нам пра сапраўдны кошт свабоды. Таму я заклікаю вас сёння — берагчы дэмакратыю і дапамагаць тым, хто змагаецца за свабоду”, — сказала Ціханоўская.
25-е зімовае пасяджэнне ПА АБСЕ праходзіць 19–20 лютага ў Вене (Аўстрыя).
19 лютага Ціханоўская выступіла на мерапрыемстве, на палях пасяджэння, “Беларусь і Парламенцкая асамблея АБСЕ: круглы стол аб шляху да дэмакратыі і гуманітарных прыярытэтах”. Суарганізатарамі круглага стала выступілі дэлегацыі Швецыі і Нарвегіі ў ПА АБСЕ сумесна з офісам дэмлідара.
Дарадца Ціханоўскай па парламенцкай супрацы і канстытуцыйнай рэформе Анатоль Лябедзька заявіў “Парламенцкаму каналу”, што на пасяджэнні быў запушчаны працэс стварэння ў рамках ПА АБСЕ дэпутацкай групы “За дэмакратычную Беларусь” і дэлегацыі дэмсіл у асамблеі.
Варта адзначыць, што ў пасяджэнні бярэ ўдзел дэлегацыя Нацыянальнага сходу Беларусі ў складзе кіраўніка дэлегацыі пры ПА АБСЕ, старшыні пастаяннай камісіі Палаты прадстаўнікоў па міжнародных справах Сяргея Рачкова і аднаго з намеснікаў яе пастаянных членаў — члена камісіі Савета Рэспублікі па міжнародных справах і нацыянальнай бяспецы Алега Румо.
Рачкоў, выступаючы 19 лютага на пасяджэнні Агульнага камітэта па палітычных пытаннях і бяспецы, “звярнуў увагу на недапушчальнасць выкарыстання пляцоўкі ПА АБСЕ экстрэмісцкімі элементамі, якія пераследуюцца ў Беларусі на падставе закону”.
