Раскрытыкаваны Лукашэнкам “БелВітуніфарм” атрымаў канкурэнтную перавагу пры рэалізацыі ветпрэпаратаў

14 лютага, Позірк. Прынады для вакцынацыі дзікіх драпежных жывёл ад шаленства, а таксама паслугі па роскідзе начыненай прэпаратам ежы з дапамогай авіяцыі ў 2026–2027 гадах дазволена набываць у прадпрыемства “БелВітуніфарм” на падставе працэдуры дзяржзакупкі з адной крыніцы, вынікае з пастановы Савета міністраў № 75 ад 13 лютага.

Акрамя таго, у гэтай арганізацыі, а таксама ў Інстытута эксперыментальнай ветэрынарыі імя С. М. Вышалескага на працягу двух гадоў можна без тэндару набываць біялагічныя ветэрынарныя прэпараты.

Інстытут эксперыментальнай ветэрынарыі — даччыная структура Навукова-практычнага цэнтра па жывёлагадоўлі Нацыянальнай акадэміі навук. На пачатку гэтага тыдня стала вядома, што галоўнае навуковае ведамства чакае аптымізацыя, закліканая, паводле слоў яе кіраўніка Уладзіміра Караніка, “пазбавіцца ад грувасткай і неэфектыўнай структуры кіравання”.

Адкрытае акцыянернае таварыства “БелВітуніфарм” размешчанае ў вёсцы Доўжа ў Віцебскім раёне. Год таму, у лютым 2025-га, былы кіраўнік прадпрыемства Сяргей Бальшакоў быў прыгавораны да 4 гадоў зняволення паводле ч. 2 і 3 арт. 210 (перавышэнне ўлады або службовых паўнамоцтваў) і арт. 426 (крадзеж шляхам злоўжывання службовымі паўнамоцтвамі) Крымінальнага кодэкса з трохгадовай адтэрміноўкай выканання пакарання, а таксама аштрафаваны на 3.000 базавых велічыняў (на той момант — 126 тыс. рублёў).

У жніўні 2025 года “БелВітуніфарм” трапіў пад крытыку Аляксандра Лукашэнкі. На нарадзе па развіцці біяфармацэўтыкі палітык заявіў, што на прадпрыемстве “не завершаны вытворчы комплекс па выпуску вакцын”, “дарагое абсталяванне прастойвае”.

Цяперашні дырэктар прадпрыемства Ілля Дароўскіх летась у кастрычніку панаракаў на беларускім тэлебачанні, што краіна “вельмі залежная” ад імпарту вакцын супраць хваробы птушак, свіней; самастойна закрывае не больш за чвэрць патрэбы ў вакцынах супраць хваробы буйной рагатай жывёлы.

Звярнуўшы ўвагу на тое, што ў асноўным прэпараты ішлі з ЗША і краін Еўрасаюза, спікер дапусціў магчымасць наўмысных паставак адтуль небяспечных вакцын: “Гэта небяспечна, мы павінны разумець, што гэта недружалюбныя ў дачыненні да нас краіны”. “Кожны флакон вакцыны мы не можам праверыць, гэта фізічна немагчыма. І мала таго, што маюцца магчымасці зрыву паставак гэтых вакцын, што ўжо небяспечна для развіцця жывёлагадоўлі, птушкагадоўлі, але і стварае пэўную біялагічную небяспеку для нашых жывёлагадоўчых, птушкагадоўчых, свінагадоўчых аб’ектаў”, — заявіў ён.

Паводле слоў Дароўскіх, штогод на набыццё ветэрынарных вакцын выдаткоўваецца 96–98 млн долараў. Каб пазбегнуць залежнасці, адзначыў ён, на базе прадпрыемства збіраюцца стварыць “біятэхналагічны кластар” для “пастаяннай распрацоўкі новых імунабіялагічных прэпаратаў як у медыцыне, так і ў ветэрынарыі”.

“Мы плануем стварыць на нашай пляцоўцы цэнтр па маніторынгу і дыягностыцы інфекцыйных захворванняў жывёл у нашай краіне і ў найбліжэйшым замежжы, каб нам разумець, якія імунапрафілактычныя мерапрыемствы праводзіць у сельгасарганізацыях”, — сказаў ён.

Кіраўнік прадпрыемства таксама заявіў, што ў 2027 годзе плануецца распачаць “выпуск першых валідацыйных серый, доследна-прамысловай серыі па ветэрынарных вакцынах”. “Далей мы пачынаем мадэрнізацыю існага вытворчага корпуса па ветэрынарыі. І да 2030 года мы павінны завяршыць мадэрнізацыю гэтай ветэрынарнай лінейкі цалкам”, — абмаляваў ён тады планы на будучыню.

Дароўскі заявіў, што праца “БелВітуніфарма” ў перспектыве “дазволіць не толькі закрыць увесь спектр патрэбнасці краіны ў вакцынах для жывёл, але і таксама нарасціць экспартныя пастаўкі”.