Зяленскі выключыў магчымасьць перамоў з Пуціным на тэрыторыі Беларусі
12 лютага, Позірк. Магчымасць правядзення перамоў з прэзідэнтам Расіі Уладзімірам Пуціным у Маскве ці на тэрыторыі Беларусі выключыў кіраўнік украінскай дзяржавы Уладзімір Зяленскі, адказваючы на пытанні ў чаце Офіса прэзідэнта Украіны, паведамляе TSN.UA.
“Я не магу прыехаць на перамовы з Пуціным у Маскву — сталіцу краіны, якая з’яўляецца агрэсарам у гэтай вайне”, — падкрэсліў палітык.
Аргументуючы, чаму з пераліку патэнцыйных перагаворных пляцовак выключаная Беларусь, Зяленскі адзначыў, што афіцыйны Мінск з’яўляецца непасрэдным саюзнікам РФ, які садзейнічаў наступу на Украіну ў 2022 годзе. Украінскі бок гатовы разглядаць “іншыя геаграфічныя варыянты” для сустрэчы, у прыватнасці, пры пасрэдніцтве заходніх партнёраў або на нейтральнай тэрыторыі.
“Мы гатовыя падтрымаць прапановы ЗША сустракацца на любых тэрыторыях — Амерыка, Еўропа, нейтральныя краіны. Любыя дзяржавы, акрамя РФ і Беларусі. Беларусь — бо яна з’яўляецца саюзнікам у наступе на Украіну ў 2022 годзе”, — падсумаваў ён.
28 кастрычніка 2025 года Зяленскі ўжо заяўляў, што Кіеў згодны на перамовы пра спыненне вайны ў любым месцы, акрамя РФ і Беларусі. “Калі будуць вынікі, то, ды дабраславіць Бог, няхай перамовы пройдуць дзе заўгодна, — сказаў ён. — Гэта амаль не мае значэння, толькі не ў Расіі, вядома, і ўжо дакладна не ў Беларусі”.
27 траўня таго ж года ўкраінскі прэзідэнт таксама назваў немагчымым правядзенне перамоў з РФ у Беларусі.
“Як вам сказаць, да чаго гэта падобна? Калі не хочуць, мне здаецца, людзі павінны сказаць: “Мы зараз не гатовыя. Ці не хочам заканчваць вайну”. Бо гэта несур’ёзна. Беларусь для нас сёння з’яўляецца краінай, з якой паляцелі ракеты, і, адпаведна, яна з’яўляецца саюзнікам краіны, якая на нас напала. І войскі заходзілі з Беларусі. Гэта проста немагчыма ў дачыненні да Беларусі”, — канстатаваў кіраўнік украінскай дзяржавы.
25 студзеня 2026 года Зяленскі і беларускі дэмакратычны лідар Святлана Ціханоўская правялі ў Вільнюсе паўнафарматныя двухбаковыя перамовы. Цяпер вядзецца падрыхтоўка да візіту Ціханоўскай у Кіеў, а ўкраінскі бок рыхтуецца прызначыць спецпрадстаўніка для кантактаў з дэмсіламі Беларусі.
Аляксандр Лукашэнка і прадстаўнікі яго рэжыму неаднаразова заяўлялі, што могуць прыняць у сябе перамоўныя дэлегацыі Украіны і РФ. Пры гэтым сваю ролю яны ацэньваюць супярэчліва, то выказваючы гатоўнасць стаць пасярэднікам, то катэгарычна ад гэтага адмаўляючыся.
На сустрэчы з прэзідэнтам Расіі летась 26 лістапада ў Бішкеку (Кыргызстан) Лукашэнка пацвердзіў “гатоўнасць аднавіць мірныя перамовы па Украіне на мінскай пляцоўцы”.
Такую заяву ён зрабіў, рэагуючы на словы Пуціна — той сказаў, што “літаральна з першых дзён [расійска-ўкраінскай вайны] усе намаганні, якія рабіліся Беларуссю па гэтым кірунку, мелі добры вынік”. “І першыя нашы кантакты па гэтым пытанні з кіеўскім рэжымам праходзілі менавіта на беларускай зямлі”, — адзначыў прэзідэнт РФ.
24 лютага 2022 года Расія распачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Расследавальнікі неаднаразова прадстаўлялі даныя, якія сведчаць пра тое, што многія беларускія прадпрыемствы актыўна займаюцца вытворчасцю на карысць расійскага вайскова-прамысловага комплексу.
Расійска-ўкраінскія перагаворы на тэрыторыі Беларусі ў 2022 годзе праходзілі ў Гомелі (28 лютага) і Брэсце (3 і 7 сакавіка).
