Базавая інфляцыя ў студзені склала 6,9% у гадавым вымярэнні — Нацбанк

10 лютага, Позірк. Базавая інфляцыя (не ўлічвае сезонныя тавары, а таксама тавары і паслугі, якія часта змяняюцца ў цане ў кароткатэрміновай перспектыве або рэгулююцца дзяржавай) у студзені 2026 года склала 6,9% (тут і далей у гадавым выражэнні), вынікае з апублікаванага Нацыянальным банкам агляду інфляцыйных працэсаў.

У снежні 2025-га гэты паказчык раўняўся 7,3%, у лістападзе — 7%.

Рост цэн на плодаагароднінную прадукцыю (сезонныя тавары) у мінулым месяцы знізіўся да 3,7% (+4,9% і +12,7% адпаведна).

Рост цэн і тарыфаў, што рэгулююцца дзяржавай, склаў 6,6% (+6,4%, +6,2%).

Агрэгаваны паказчык трэндавай інфляцыі (індыкатар інфляцыі, ачышчаны ад уплыву рознага роду шокаў) вырас на 6% (+6,3% і +6,1%).

Спажывецкія цэны ў студзені 2026 года выраслі на 0,5%, у гадавым вымярэнні — на 6,4%.

Летась інфляцыя склала 6,8%. Згодна з зацверджанымі Аляксандрам Лукашэнкам найважнейшымі прагнознымі параметрамі развіцця краіны на 2025 год цэны не павінны былі вырасці больш, чым на 5%. Такім чынам афіцыйная інфляцыя па выніках года перавысіла планавы паказчык на 1,8 працэнтнага пункта.

Памесячныя паказчыкі “дапушчальнага росту цэн” да канца 2026 года зацверджаны пастановай Міністэрства антыманапольнага рэгулявання і гандлю № 84 ад 30 снежня 2025-га.

Гадавы прырост не павінен перавысіць 7%, як і закладзена ў зводзе найважнейшых прагнозных паказчыкаў развіцця Беларусі.

У студзені цэны не павінны былі вырасці больш чым на 0,7% да ўзроўню снежня 2025-га (па факце +0,5%).

Далей нарастаючым вынікам: люты — не больш за 2%, сакавік — 2,5%, красавік — 3,1%, травень — 3,4%, чэрвень — 3,8%, ліпень — 4%, жнівень — 4,2%, верасень — 4,9%, кастрычнік — 5,5%, лістапад — 6,2%.

Тэндэнцыю росту інфляцыі “неабходна пераламіць”, заявіў Лукашэнка 9 верасня 2025 года ў Мінску на нарадзе з апаратам Нацыянальнага банка і кіраўніцтвам банкаў.

Паводле інфармацыі Нацбанка, адчувальная інфляцыя, згодна з вынікамі штоквартальнага апытання насельніцтва, у снежні 2025 года ў гадавым вымярэнні склала 11,3%, чаканая інфляцыя ў наступныя 12 месяцаў — 11,2%.

У верасні 2025-га гэтыя паказчыкі былі роўныя 11,2% і 10,7% адпаведна. Такім чынам, паказчык адчувальнай інфляцыі вырас на 0,1 п.п., чаканай — на 0,5.