Беларусам сімпатызуе пятая частка палякаў, негатыўна ставіцца каля паловы — даследаванне

6 лютага, Позірк. Беларусы ўваходзяць у тройку нацыянальнасцяў, якім найменш сімпатызуюць жыхары Польшчы, сведчаць вынікі даследавання, якое 8–20 студзеня правёў польскі фонд “Цэнтр даследаванняў грамадскай думкі”, апытаўшы 938 рэспандэнтаў.

У спісе з 21-й пазіцыі беларусы займаюць 19-е месца. Пра сімпатыю да іх заявіла 19% апытаных, абыякавасць — 26%, негатыўнае стаўленне — 46%, не змагло вызначыцца — 8%.

На 20-м месцы — ромы (стаўленне — 18%, 27%, 46% і 9% адпаведна), на 21-м — расіяне (7%, 15%, 74% і 3%).

Найлепшае стаўленне ў палякаў, паводле даследавання, да італьянцаў (58%, 29%, 7% і 7%), чэхаў (55%, 31%, 9% і 6%) і славакаў (52%, 29%, 11% і 8%)

На кастрычнік 2025 года ў Польшчы было легалізавана сама меней 146 тыс. грамадзян Беларусі, паведаміла 12 снежня 2025 года ў Вільнюсе юрыст Алеся Пажыток, якая спецыялізуецца на міграцыйным праве.

Паводле яе слоў, гэтыя даныя не ўлічваюць беларусаў, якія знаходзяцца ў краіне на падставе віз, знаходзяцца ў чаканні дазволу на жыхарства або рашэння аб наданні міжнароднай абароны.

Пажыток адзначыла, што ў 2021 годзе Польшча ўхваліла 100% заявак беларусаў на прадастаўленне міжнароднай абароны, 2022-м — 99%, 2023-м — 98%, 2024-м — 94%, ад пачатку 2025-га — 93%.